ВИСЕР ВӦЛӦСЬТУВСА СЮЗЯЫБ СИКТЫН

Сюзяыб сикт пукалӧ нёль верст сайын вӧлӧсьтсяньыс Висер ю бердын. Сиктын керка 80 гӧгӧр.

Йӧз нянь уджалӧм помысь оз вермыны овны, нажӧвитчӧны вӧралӧмӧн да сортовка лэдзӧмӧн. Вундӧм бӧрын тувсов рӧспутаӧдз мужикъяс ставныс вӧрын олӧны. Эм ЕПО. Сэні шленын унджык йӧзыс. Таво тулыс Епо сетіс уджӧн уна тӧвар ур кыйӧм вылӧ. Эмӧсь сё шайтӧдз уджйӧза крестьянаяс. Ур таво вермисны кыйны зэв этша: кызь-комынӧн ур кыйсьысь вылӧ. Мукӧд нажӧтка некутшӧм на абу. Кер лэдзан удж таво эз ло.

Вӧр лэдзысьяс ӧтувтчисны профсоюзӧ, гижсисны морт 55 кымын. Вӧр лэдзан удж кӧ оз ло, йӧзӧс ёна дзескӧдас, уджйӧз мынтыны Епоыслы оз вермыны. Колӧ кыдзкӧ Профсовет пыр сетны Сюзяыбсалы уджавны кер дінын, восьтыны делянка кык кымын.

Йӧз велӧдан, югдӧдан удж некутшӧма оз мун. Лыддьысян керка абу, ӧніяногса нига весиг ӧти абу.

Воӧны газетъяс сӧмын ЕПО-ӧ да нӧшта морт-мӧдлы. Воӧ газетъяс: «Беднота», «Югыд туй», «Крестьянскӧй газет».

Е. Р.