ОКТЯБР ЛУН ПОЖӦГЫН

(Кулӧмдін уезд улын)

Октябрса революция праздник Пожӧгын таво бура коллим. Праздник лунӧ 12 часын чукӧртчисны йӧз флагъясӧн-плакатъясӧн Исполком дінӧ. Кӧкъямыс верст сайсянь мукӧд йӧзыс вӧлі локтӧмаӧсь. Исполком бердын висьталісны Исполкомсянь, коммунист ячейкасянь, кооперативсянь дай мукӧд. Висьталісны, мый сетіс Октябрса Революция уджалысь йӧзлы, кыдз тайӧ лунсӧ празднуйтісны.

Сэсянь мунісны Арсень Пашнин гу вылӧ (сійӧс белӧйяс лыйлісны 1919 воын), кӧні висьталісны, мый вӧсна ёрт Пашнинӧс лыйлісны; ёрт гу вылын кӧсйысисны не лэдзны киысь гӧрд флаг, кытчӧдз сійӧ оз кут дзирдавны став му пасьталаыс. Сы бӧрти Нардомын висьталісны, кутшӧм Сӧвет власьтлӧн олӧм ас муас, кутшӧм мукӧд государствояскӧд, кыдзи сійӧ овмӧссӧ кыпӧдӧ, кыдзи мукӧдлаын уджалысь йӧз вермасьӧ озыр йӧзкӧд.

Рытын вӧлі спектак. Ворсісны «Райын» — Нёбдінса Витторлысь. Спектак вылын видзӧдысь вӧлі морт 300 гӧгӧр, муртса тӧрисны Нардомӧ. Вӧліны пӧрысь йӧз ар ветымынаӧсь дай гырысьджык. Быдӧнлы Октябр лун колльӧдӧм воис сьӧлӧм вылас.

Зі.