АБЪЯЧОЙЫН

(Сыктыв уезд улын)

Профсоюзын.

Профсоюз уджалӧ ӧні бура. Овлывлӧ собранньӧяс тшӧкыда, чукӧртчывлӧны шленъясыс велӧдчыны. Упрофбюро, буракӧ, вунӧдӧма Абъячойса профсоюзӧс. Мӧдӧдлывлісны протоколъяс сэтчӧ, найӧ нинӧм оз гижлыны. Колӧ топыдджыка ӧтувтчыны. Мукӧд шленъяслӧн абу на профсоюзса билетныс, Всеработпросса шленъяслӧн весиг ӧтилӧн на абу. Корлісны билетъяссӧ Упрофбюролысь, сэсянь нинӧм оз гижны.

Крестьяна том йӧзлӧн школа.

Октябрӧ, 14-ӧд лунӧ, воссис крестьяна том йӧзлӧн школа. Школа восьтігӧн чукӧрмыліс зэв уна йӧз. Школа вылын юралысь ёрт Лобанов висьталіс, мый вӧсна воссьӧ тайӧ школаыс, мый сэні кутасны велӧдны. Сэсся висьтавлісны ёртъяс РЛКСМ-сянь, велӧдысьяссянь, пионеръяссянь, агрономъяс. Рытнас сэсся сувтӧдісны спектак. Школаӧ босьтісны комын мортӧс.

Епо.

Епоын удж мунӧ лӧсьыда. Ӧні восьтісны вый вӧчан завод (маслобойный), лӧсьӧдісны скӧт видзанін. Босьтісны Епоӧ шленъясӧ медгӧль крестьянаӧс прӧста, шленӧ пырӧм сьӧм босьттӧг. Епо судзӧдӧ лыддьысян керкаӧ газетъяс. Тӧвар эм быдсямаыс, сакар кындзи. Йӧзыс бура видзӧдӧны Епо вылӧ.

Мынтысисны лыддьысян керка вӧчӧм вылӧ.

Юговка сиктын собранньӧ вылын сёрнитісны босьтны быд керкаысь кык урӧн сьӧм лыддьысян керкаӧ видзӧмысь мынтысьны. Ӧткымын мужик вӧлі петитчӧ сыысь. «Кысь нӧ пӧ миянлы 2 урыс быд тӧлысьнас», — шуӧны. Том йӧз да нывбабаяс сералісны сэтшӧм шуасьысьяссӧ, кӧсйисны быд ногыс отсавны лыддьысян керкалы: выйӧн, колькйӧн, кудельӧн, сьӧмӧн. Аттьӧ тіянлы, коми нывбабаяс! Велӧдӧй, кыдзи колӧ уджавны ассьыныд мужикъяснытӧ.

Корреспондент.