ЕГИПЕТЫН АБУ ЛЮЧКИ

ЛОНДОН. Александрияын виӧм генерал Ли Стэк водзын панапида сьылігӧн йӧзыс ветлӧдлісны уличаӧд да горзісны: «Оз ков миянлы Англияыд!» Ёрисны найӧ англичанаӧс. Сідзжӧ ветлӧдлісны уличаясӧд гырысь школаясын велӧдчысьяс, горзісны: «Оз ковны миянлы англичанаясыд! Натӧг ми оламӧй!»

Египетын олысь медыджыд комиссарыс Англиясянь — Алленби — мыччис Египетса правительстволы нота, тшӧктӧ налы корны прӧща генерал Ли Стэкӧс виӧмысь, тшӧктӧ виысьяссӧ зэв чорыда судитны, корӧ сьӧмӧн витсё сюрс пунт стерлинг (ӧти пунт стерлингыс миян ногӧн кӧ — 6 шайт 35 ур), оз тшӧкты лэдзны ветлӧдлыны уличаясӧд нимкодясьӧмӧн да горзігтырйи (устраивать демонстрации), тшӧктӧ корны Суданысь египетса офицеръясӧс да салдатъясӧс. Воча гижӧдчыны сетіс срок сӧмын 24 час.