КОЛӦ ТӦДНЫ! КОЛӦ ОТСАВНЫ!
Квайтӧд юкӧн му вылысь уджалысь морт орӧдіс чепъяс, шыбитіс ас вывсьыс буржуй-капиталистӧс, босьтіс ас киас власьт, лӧсьӧдіс СССР. Сизим во нин, кӧкъямысӧд во вылӧ петіс, уджалысь йӧз квайтӧд юкӧн му вылын ас кинаныс аслыныс дорӧны шуд. Лунысь лунӧ СССР сувтӧ ёнджыка кок йылӧ, сӧвмӧ, ёнмӧ. Быд ногыс пеж дась нянь сёйысьяс зілисны венны уджалысь йӧзӧс, бӧр чышкыштны му вылысь Сӧвет власьт (дай ӧні на корсьӧны стрӧка), сӧмын нинӧм эз вермыны вӧчны, дай оз вермыны. Эз вермыны — ӧти-кӧ, Сӧвет власьтлӧн пиньясыс вӧлі вывті ён да ёсь, мӧд-кӧ — асланыс государствоса уджалысь йӧз быд ногыс вештісны налысь горша нюжӧдӧм кинысӧ Сӧвет власьтлань.
Квайтӧд юкӧдлӧн вит пайыс му вылыс капиталист киын на. Сэні уджалысь йӧзлысь важ моз на пычкӧны вир. Уджалысь йӧз вермасьӧны быд ног капиталистъяскӧд, кӧсйӧны ас кианыс Рочмувывса уджалысь йӧз моз босьтны власьт, тыш лунысь-лун кыптӧ, паськалӧ, быдмӧ. Капиталистъяс сыысь уджалысь йӧзӧс оз малавны юрӧдыс, лыйлӧны, пуксьӧдалӧны тюрмаясӧ, быд ногыс тюрмаын кедзовтӧны, видзӧны тшыг нисьӧ пӧт. Семьяныс сэтшӧм уджалысь йӧзлӧн кольӧ уджтӧг, тшыгъялӧ. Уджалысь йӧзӧс, кодъяс кӧсйӧны миян моз, ёртъяс, долыда, капиталистъястӧг, овмӧдчыны, капиталистъяслӧн государствоыс пуксьӧдалӧ тюрмаӧ!
Уджалысьяс оз кӧсйыны эновтны налы кокниджык олӧм да сы вӧсна капиталист тюрмаӧ веськалӧм йӧзӧс. Эмбуртӧмъяс революция кыпӧдысьясӧс кӧсйӧны отсавны, отсалӧны. Сы вӧсна лӧсьӧдӧма Ставмувывса Революция Кыпӧдысьяслы Отсасян Общество. Рочӧн шусьӧ: «
МОПР эм и миян СССР-ын, эм тшӧтш Коми Обласьтын. Регыд Сӧвет республикаын лоӧ Мопр вежон (декабрын 1−7 лунъясӧ). Сійӧ вежонас кутасны висьтавлыны, корны пырны Мопрӧ, судзӧдны сьӧм.
Коми йӧз! Капиталистъяс тюрмаясын уна дас сюрс уджалысь йӧз дор сулалысь мортӧс сісьтӧны, тшыгйӧдӧны, семьянысӧ налысь кольӧны няньтӧг. Лунысь-лун уджалысь йӧз, революция кыпӧдысь тюрмаясын содӧ. Оз ӧтиӧн, кыкӧн, дас мортӧн сод, а сёясӧн ӧтпырйӧ. Миянлы мый вермам колӧ налы отсавны. Найӧ миянлы отсалісны тышкасьны капиталистъяскӧд, водзӧ кежлӧ миянлы отсаласны найӧ лӧсьӧдны став му вылын Сӧветскӧй власьт, найӧ бырӧдасны капиталистъясӧс. Тюрмаын пукалысь эмбуртӧмъяс дор сулалысь йӧз миян вокъяс, найӧ виччысьӧны миянсянь отсӧг. Колӧ, ёртъяс, та йылысь тӧдны, колӧ отсавны! Пырӧй Мопрӧ, Ставмувывса Революция кыпӧдысьяслы отсалан Обществоӧ.
