«КИЛА»

Бабаяс сёрнитӧны:

— Матрен, общественнӧй лавкаад ӧд зэв бур ковта дӧра вайисны. Он ӧмӧй ньӧб?

— Мый нӧ ме ковтаала?!. Няньыд кӧ эм, мый сэсся колӧ. Ковтанад он тай пӧт, буракӧ.

— Но да тэ нӧ кысь убӧлитан. Ыджыд мамыд моз жӧ кыз дӧра нэм чӧжыд кӧсъян новлыны.

Тайӧ сёрнисӧ кыліс Опонь Степ, шуис бабаяслы:

— Ті, бабаяс, колӧкӧ ньӧбасьӧй ӧдйӧджык, дыр кӧ виччысянныд — сэсся тіянлы тӧвар пыддиыд кила кутасны вӧзйыны.

— Мый нӧ ми килаалам? Коді сійӧс нажӧвитіс — сійӧ мед и кыскалӧ, — дӧзмисны бабаяс.

— Ок, ок, йӧзъясӧй! Видзӧдӧ, кыдзи сэсся няньтӧ кутанныд сёйны да думайтны: «кымын кила пӧ лоӧ тайӧ няньысь».

— Да мый нӧ сійӧ килаыс лоӧ?

— Гира, гира.

— Но, зонмӧ, — шензьӧны бабаяс, — уна-ӧ нӧ сійӧ лэптӧ?

— Кыдзсюрӧ кӧ-а. Кодыс пуд, кодыс унджык.

— Думайтасны тай. Важ гираясыд нӧ мый?

— Сідз нин тай вӧчӧмаӧсь-а.

— Та бӧрын ӧд яндзим лоӧ ньӧбасьныд.

— Яндзим кӧ ӧд, огӧ и кутӧ ньӧбасьнысӧ.

_____

Шаховлы (коми кывйӧ пӧртан юкӧн) колӧ кыдзкӧ думыштны та йылысь да кутшӧмкӧ коми ним сетны тайӧ выль вес гиралы, а то бабаяс оз лысьтны лавкаӧ пырны.

Н. Рам.