ПОШТА КУД

Лэбачлы. Клавдий поп, гижан, ёна кужӧ юны да косясьны. Ок тэ, кымын арӧс нӧ тэныд? Коді нӧ оз тӧд сы йылысь. Быд поп ӧд юӧ, унаысь и косясьласны быдпӧлӧс «оружйӧнас» — пирӧгъясӧн, чериняньясӧн, мукӧдыс весиг крестӧдз да евангелльӧӧдз воласны. Нинӧм нин, сё муса другӧй, попъяс йывсьыд гижныыд! Найӧ асьныс регыд киритчасны дзикӧдз.

Еполы. Помӧсдінӧ. «Ас табак куритӧмлы колӧ пуктыны пом» — гижан тэ. Колӧ, дерт, пуктыны, весиг быдсяма табак куритӧмысь колӧ дугдыны — быдӧн ӧд сійӧ гӧгӧрвоӧ... Сэсся нӧ табак йылысь кындзи нинӧм нин гижныыд быдса вӧлӧсьтсьыд? Гиж, кутшӧма мунӧ вӧлӧсьтса олӧмыс, уджъясыс. Мӧд гижӧд йывсьыд эськӧ ми асьным тӧдам — колӧ, да эз на ӧнӧдз киным судзсьы. Часлы, регыд лоас. Талунъя газетысь аддзан. Вынъяс содны кутіс, ньӧжйӧник быдтор артмас: кутас, гашкӧ, коми газетыд куимысь вежоннас петны.

Коми пилы. «Октябрса революция вӧчис-ӧ мыйкӧ бурӧс коми олысьяслы» сёрмис да эз мун газетад.

Сажинлы. Тэ шуан, тэнад пӧ «Праздник храмыд» стих. Миян ногӧн, абу весиг стих дінас матыстчылӧма. Сэсся оз ков гижны, кыдзи йӧз мыссьӧны праздник лун кежлӧ, пелькӧдчӧны, юрбитӧны, вичкоын сулалӧны — сы йылысь ӧд быдӧн тӧдӧны. Гиж ас вӧлӧсьтса олӧм йылысь. Кутшӧма кӧні уджъяс мунӧны, мый выльджыкторъяс эмӧсь.

Кӧрткерӧс. Спира Прокӧлы. Вит пӧлӧс гижӧдсьыд газетӧ нинӧм оз позь сюйны. Стихъястӧ колӧ зэв бура шыльӧдны. Гиж, сӧвмӧдчы водзӧ, кытсюрӧ эмӧсь бура-шогманаинъяс — гашкӧ, коркӧ мыйкӧ артмыны кутас.