ПЕМЫД ГУРАНЫН
(Кулӧмдінсянь Мысӧдз ветлігӧн)
«Нальк».
Кулӧмдіна‐Дона костӧд туй зэв омӧль. Посъяс киссьӧмаӧсь, дзик нальк кодьӧсь, лоӧ повны. Уна вӧв кок нин доймавлӧма. Справитысь некод абу. Уна вӧвъяс на, ме чайта, нальк-посъясад шедласны.
Исполком дуркиник.
ДОНЫН сельскӧй исполкомын олӧны ёна дурка. Ме дырйи волісны велӧдчысьяс, корӧны газет: ми пӧ сӧмын колян вося газет лыддьывлам. Ӧти газет весиг исполкомын абу.
30 верст сайӧ истӧгла.
Воим Джеджимӧ. Сӧветскӧй станция игана, ямщикыс мунӧма кытчӧкӧ пукавны. Джеджимса олӧны омӧля-гӧля: няньяс пӧ, шуӧны, быд во кынмӧны. Абу некутшӧм лавка. Истӧг ли карасин ли кӧ колӧ, лоӧ лэччывны Донӧдз либӧ Кулӧмдінӧдз.
Кӧлача самӧкурӧн...
Джеджимын эськӧ мастерӧвӧй йӧз абуӧсь да, ставныс кужӧны самӧкур пуны (тыдалӧ, кынмӧм няньыд оз сёйсьы). Мужикъяс и бабаяс юӧны ӧтмоза, ӧтвылысь гозйӧн-гозйӧн сідзи и шӧйтӧны, бать-мамсьыс и челядьыс оз кольччыны. Мукӧд нывбабаясыс йӧлӧн пыдди кагаяснысӧ вердӧны кӧлача самӧкурӧн: «сійӧ пӧ здоровджык»...
«Гажа» жӧ нин, аттӧ!
Сэсся Джеджимса рытсянь вой шӧрӧдз да асывсянь лун шӧрӧдз мӧда-мӧд орданыс чукӧртчӧмӧн пукалӧны, самӧкур дуньгӧны да «бурсьылысьяслысь» лӧвтӧмсӧ кывзӧны... Аттӧ, мӧвпыштан да, гажа жӧ нин Джеджимсалӧн олӧмыд, кӧть няньыд быд во кынмӧ-а!.. Налӧн эм выль «евангелист» — Керчомса Ӧлексан Микол. Сійӧ кык нывбабакӧд ветлӧ сиктысь сиктӧ да ылӧдлӧ пемыд йӧзтӧ.
«Пророкъяс».
Лебежнӧйын Джеджимын моз жӧ олӧны. Сэні весиг эмӧсь «пророкъяс» — кык ли куим пӧ... Найӧ мӧда-мӧд вежмысьт «бурсьылӧны» да самӧкур голькйӧны. Унаысь пӧ тышкӧдз ас костаныс волӧны. Буракӧ, скӧр пророкъяс, Илля пророк кодьӧсь кымын... Оз тай найӧс енмыд ас дінас ловйӧн босьт...
Мысын эм нин весиг «богородича» — 18 арӧса ныв, зэв мастер «бурсьывны». Татшӧм «богородичаыс» сэні мӧд нин. Ӧтикыс кодкӧ воӧ вайлӧма нин «богсӧ» (кага). Выльыс дінӧ кутшӧмкӧ «аркангел Габрил» волӧма жӧ нин: «
Лӧсьыд Мыссалы кык «богородичанад» и овны! Быд приччаысь кӧнкӧ видзӧны. Кодсюрӧ эськӧ нывбаба костысь шуасьӧны жӧ:
— Бурӧс сьылӧны, да лёкӧс вӧчӧны.
Ок, ок, ок, пемыд войтырӧй! Дыр-ӧ нӧ ті нидзувъяс моз кутанныд веглясьны? Шыбитӧй лёк пемыд олӧмнытӧ, кутчысьӧй югыдлань!
Гегемон.
