КУТШӦМА КОЛЛЯЛІСНЫ ОКТЯБР ЛУН

Выльгортын.

Праздник воддза луннас быд сиктын вӧліны собранньӧяс; сэні висьтавлісны: кыдзи Россияын овлісны йӧзыс революцияӧдз, мый понда лои Октябрса революцияыс, мый сійӧ вайис пабрик-заводын уджалысьяслы да крестьяналы, кутшӧм бурторъяс вермасны лоны водзӧ.

Сы бӧрын сэні жӧ бӧрйисны депутатъясӧс — праздник луннас исполкомӧ чукӧртчывны.

Рытнас школаын вӧлі спектакль, ворсісны «Коммунистка Вера». Видзӧдысь вӧлі дзик тырыс, унджыкыс олӧма крестьяна, тыдалӧны вӧлі и дзор тошаяс. Унаӧн на пытшкысь вӧліны сэтшӧмъяс, кодъяс войдӧр спектакасьӧмтӧ зэв омӧля нимтылісны, эз кӧсйывны волывны. Кывзісны бура, шы ни тӧв. Сӧмын шуасисны бӧрвылас: колі пӧ ворсны эськӧ комиӧн, ёнджыка пӧ эськӧ гӧгӧрвоим.

Праздник луннас, рытнас вӧлі гажа (торжественнӧй) пукалӧм. Ыджыд праздникӧн пӧздравитӧм бӧрын бара висьтавлісны тӧрытъя кодь висьтъяс Октябрса революция йылысь. Сы бӧрын вӧлі спектакль, ворсісны карса совпартшколаын велӧдчысьяс — пьеса «Смычка». Сӧмын йӧзыд эз прамӧя гӧгӧрвоны — бара рочӧн ворсісны да; сэсся унаӧн недӧвӧленӧсь колины, шуасьӧны: вывті пӧ ворсанторйыс дженьыд, та дыра кежлад пӧ эз и ков волыны.

Спектакль бӧрын том йӧз бура дыр на гажӧдчисны.

Видзӧдысь.

Зеленечын.

Став общественнӧй керкаяс мичмӧдӧмаӧсь ньыв лыскӧн, флагъясӧн, плакатъясӧн быдпӧлӧс гижӧдъясӧн (лозунгъясӧн).

Праздник лунас вӧлі уличын демонстрация. Митинг вылын висьтавлісны Октябрса революция йылысь. Ӧтик ичӧтик велӧдчысь зэв лӧсьыда сэні висьталіс, кутшӧма велӧдлісны важӧн и кутшӧма велӧдӧны Октябрса революция бӧрын.

Митинг бӧрын клубын вӧлі торжественнӧй заседанньӧ. Сэні Зеленечса крестьяналӧн шеф сетіс знамя да ичӧтик библиотека (40 нига) видз-му уджалӧм йылысь, кӧзяйство кыпӧдӧм йылысь. Та кузя крестьяна шуисны ыджыд аттьӧ шефлы: ми пӧ ӧні гӧгӧрвоим «смычка» — ӧтувтчӧм рабочӧйяслысь крестьянакӧд, водзӧ пӧ кӧсйысям чорыдджыка кутчысьны мӧда-мӧдкӧд (рабочӧй крестьянакӧд) ӧтвылысь кыпӧдны кӧзяйство Сӧвет Республикалысь.

Сэні жӧ сэсся вӧлі казьтылӧмъяс Октябрса революция вӧсна вермасьӧм йылысь, мукӧдтор.

Заседанньӧ бӧрын шеф гӧститӧдіс велӧдчысьясӧс.

Рытнас петкӧдлісны туманнӧй картинаяс да вӧчисны спектакль — ворсісны «Коді мыжа».

Праздник коли зэв лӧсьыда.

Н. Чук.

Сёськаын, Сыктыв уезд улын.

Праздник колльӧдім колян вося дорысь бура.

Праздник вечерняас вӧлі школаын торжественнӧй заседанньӧ. Висьталысьяс вӧліны РЛКСМ-сянь, Исполкомсянь, шефсянь, велӧдысьяссянь, школьникъяссянь, мукӧд организацияяссянь.

Висьталӧм бӧрын примитім татшӧм резолюция: «Ми, Сёськаса том войтыр, велӧдчысь йӧз, чукӧртчим Октябрлы сизимӧд во тыран лунӧ и шуам: Ленин абу, но пиыс сылӧн — Компартия — нуӧ сылысь визьсӧ (линия) веськыда; сиам и водзӧ РКП-лы бура уджавны да ӧдйӧджык миянӧс петкӧдны пемыдлунысь».

Заседанньӧ бӧрын петкӧдліс шеф туманнӧй картинаяс.

Праздник луннас вӧлі уличын демонстрация. Сэні вӧліны: комсомол, шеф, велӧдчысьяс, учительяс, служащӧйяс, бура уна крестьяна. Рытнас вӧлі спектакль, докладъяс шефсянь да бара туманнӧй картинаяс. Йӧз вӧлі зэв уна.

Праздник мӧд луннас школьникъяс асьныс гажӧдчисны лунтыр. Луннас вӧлі тшай. ЕПО да Союз окота пӧдаритісны налы праздник кузя пуд джын кӧлач, четверть тшай да лампассей. Сы вылӧ ми, школьникъяс, ЕПО-лы да Союз окоталы зэв ыджыд аттьӧ видзам. Рытнас вӧліны сьылӧмъяс, ворсӧмъяс.

Сёськаса школьникъяс.