МОЛИТВА ДА ВА ПЫР ВИДЗӦДӦМ

Зэв енногса Ӧпрӧсь тьӧтка: молитватӧг оз тувччы. Мунӧ туй кузяыд — став часовняястӧ лыддяс. Быд часовнялы улӧ-улӧ копыртчылас, мыйкӧ енмыслысь корас. Няйтсӧ гортсьыс оз аддзы (зэв дурка олӧ), а часовнятӧ аддзас. Сэтшӧм нин сійӧ енногса вӧлі. Висьмӧдчис сылӧн детина Васьӧ. Ӧпрӧсь пӧчӧ ӧдйӧнджык сувтіс ен водзӧ: «Енмӧй Кристосӧй, эн жӧ лэдз кувны сійӧс!»

Васьӧӧс век сьӧктӧдӧ. Ӧпрӧсь тьӧтка уськӧдчис вичкоӧ — гортса енъясыд омӧля отсалӧны. «Ыджыд енмӧй Кристосӧй, эн жӧ лэдз кувны!» Васька ӧтарӧ омӧльтчӧ, сьӧкыдджык лои сылы. Ӧпрӧсь тьӧтка Ӧрин пӧчӧ дінӧ мунӧ отсӧгла: вичко енъясыд омӧля отсалӧны. Видзӧдліс пӧчӧ висьысь вылӧ, шуис: «Вомдзасьӧма, бобӧ, вомдзасьӧма». Босьтіс кӧшӧ ва, кутіс шӧпкӧдны. Сійӧ ванас Васьӧӧс юкталіс, резіс.

«Бурдас, бобӧ, бурдас сэсся».

Васьӧ ӧтарӧ омӧльтчӧ.

«Господьӧй, эн лэдз кувны».

Виччысис, виччысис Васьӧ, кор мам дугдас енлы юрбитӧмысь — сэсся босьтіс дай кулі.

Дзебанінсяньысь локтігӧн Ӧпрӧсь тьӧткалы дум вылас уси: а йӧй жӧ нин ме, дзикӧдз вунӧді доктор дінад нулыны.

Ӧні сёр нин.

Унаӧн на коми йӧз пытшсьыд бурдӧдчӧны гортса «тӧдысьяс» (знакаръяс) ордын. Босьтам, чегас мортлӧн кутшӧмкӧ лы, либӧ вӧрзяс кыткӧ, сійӧ оз мун больничаӧ, регыдджык уськӧдчас кутшӧмкӧ Марья дінӧ да Марпа дінӧ. Сэсся найӧ вӧрзьӧминтӧ бертлӧдлӧны, нюжйӧдлӧны лёк ногӧн, кыдз вермӧны, доймысьыд лёкгоршӧн горзӧ. Мукӧддырйи вӧрзьӧм пыддиыд, кватитчасны да, мыль петӧма либӧ мукӧдтор. Мукӧдыс сэтшӧм веськӧдчӧм помсьыд нэм кежлас овлӧ китӧм либӧ коктӧм.

Лёк висьӧмъясысь (сифилис), сьӧлӧм висьӧмъясысь, гырк пытшкӧс висьӧмъясысь бурдӧдчӧны быдпӧлӧс туруннас, корнас, вужнас, мунас, няйтнас, пӧимнас, мышьякӧн, сулемаӧн, пывсьӧдӧмӧн вывті пӧсь пывсянын, киськалӧмӧн йиа ваӧн... Унаӧс мӧдӧдлӧны сідзнад, кыдз шуласны, «мӧдаръюгыдӧ».

Кодлы колӧ бур дзоньвидзалун да ловъя олӧм, колӧ эновтчыны деревенскӧй знакаръясыдкӧд тӧдмасьӧмысь: на помысь некутшӧм буртор оз вермы лоны, — дай налы аслыныс колӧ тӧдны сӧвесьт — колӧ дугдыны висьысьястӧ дойдалӧмысь, виалӧмысь. Бурдӧдысьясыс эмӧсь докторъяс, пельшӧръяс, бабкаяс, кодъяс велӧдчӧны сы вылӧ уна во, тӧдӧны мортыдлысь быд сі, быд сӧн, быд лы, быд висьӧм, быд доймӧм, быдсяма бурдӧдчан лекарствосӧ, тӧдӧны, кодлы мыйта колӧ, кутшӧм колӧ лекарство. Быдӧнлы на дінӧ колӧ сибӧдчыны.

Выльгортса.