КОМИ ТОМ САЛДАТЪЯСЛӦН ОЛӦМ

Гӧрд казарма — школа

Шыбитам енлы веруйтӧм.

Ми, коми том гӧрдармеечьяс, мунім гортысь ёна енлы веруйтігтырйи, быдӧн гортысь петігӧн пернапасасим, мукӧдыс весиг нуисны ассьыныс этшаник сьӧмнысӧ поп-дяклы молебен сьылӧдӧмысь.

Ӧні ми тайӧ вит тӧлысьсӧ служитігӧн уна нин аддзим и велӧдім, кыдзи уджалысь йӧзыс ентӧг, поп-дяктӧг да молебенъястӧг вӧчӧны аслыныс бур лӧсьыд олӧмсӧ. Ми ӧні гӧгӧрвоим: позьӧ овны енмӧс тӧдтӧг да поп-дякӧс радейттӧг бурджыка, лӧсьыдджыка. Вӧлӧмкӧ, поп-дякыд ылӧдчӧны толькӧ, мед налы ёнджыка воас сьӧмыс да мед вӧлӧм ёнджыка вермасны капиталистъясыд (озыръяс), помещикъясыд уджӧдны ас выланыс гӧль уджалысь йӧзсӧ да налысь вирсӧ унджык юны.

Ӧнісянь ми, коми гӧрдармеечьяс, шуам: гортӧ воӧм бӧрын ми шыбитам ассьыным лёк олӧмнымӧс, омӧльтор вылӧ веритӧмнымӧс да кутчысям ёна бур олӧмас, кыдзи миянӧс велӧдӧны овнысӧ велӧдчӧм бур йӧзыс.

Гӧрдармеечьяс: П. Забоев. Макаров.

Славков. Псков губерняув.

Велӧдчӧмӧн рочьясӧс панйим.

Нёль тӧлысь нин коли, кыдзи ми, коми том гӧрдармеечьяс, колим ассьыным Коми му. Тані ми ёна нин унатор тӧдмалім регыдик пӧраӧн — военнӧй делӧ йылысь и политика йылысь. Ми, Кулӧмдін карувса коми йӧз, служба вылӧ воим эськӧ дзонь тӧлысь бӧрын рочьясысь да, велӧдчӧмӧн найӧс суӧдім дай пановтім. Унатор на тӧдмалам тані кык вонад.

Ми тані комын куим морт комиыс. Позьӧ кӧ, ыстӧй миянлы газет: зэв окота тӧдны, мый вӧчсьӧ Коми муас. Виччысям зэв ёна.

Гӧрдармееч Панюков.

Луга кар.