«КРЕСТЬЯНСКӦЙ ГАЗЕТЛЫ» ВО ТЫРАН ЛУН

Ноябр 17-ӧд лунӧ «Крестьянскӧй газет» («Крестьянская газета») петӧмлы тыри во. Мӧскуаын та кузя вӧлі рыт; сэні вӧліны зэв уна делегатъяс: гӧрдармеечьяссянь, рабочӧй организацияяссянь, коммунист партиясянь, комсомолсянь, вӧліны тшӧтш деревняса олӧм йылысь гижысьяс (селькоры).

«Крестьянскӧй газетлӧн» редактор — Яковлев ёрт — висьталіс: деревняса гижысьяс лӧсьӧдӧны Сӧветса оласног деревняясын. Налы уджавны абу зэв кокньыд: мешайтӧны кулакъяс, самӧкурщикъяс да лёка служитысьяс, кодъяс оз лыддьысьны, кутшӧм ыджыд пӧльза вайӧны Сӧвет власьтлы газетӧ гижысьяс, лыддьӧны найӧс сӧмын врагъяс пыдди.

«Крестьянскӧй газет» ӧні петӧ 600.000 быд лун. Локтан вояснас колӧ лэптыны миллионӧдз быд лун. Воӧ деревняясысь 40 сюрс гижӧд быд тӧлысьын.

Калинин ёрт шуис: «Крестьянскӧй газет» — дзик видз-му уджалысьяслӧн газет. Ӧти воӧн сійӧ вермис чорыда кок йылас сувтны. Паськыда вермис кутчысьны-ӧтлаасьны крестьянакӧд.

Секретар Центральнӧй Комитет Коммунист партиялӧн — Сталин ёрт — ыстӧма письмӧ. Сэтчӧ гижӧма: «Крестьянскӧй газетлы» колӧ видзны-дӧзьӧритны ассьыс деревняса гижысьяссӧ синмӧс моз. Колӧ ёнджыка йитчыны (связаться) бура гӧгӧрвоысь крестьянакӧд, разӧдны правда деревняясӧ, югдӧдны деревняса олысьясӧс».