КЫДЗИ СУДЗӦДНЫ ГАЗЕТ

Деревняясӧ крестьяналы газет судзӧдны позьӧ уна ногӧн.

Позьӧ ӧткӧн-ӧткӧн (быд керка вылӧ). Медым поштӧвӧй рӧскод деньгасӧ мӧдӧдӧмысь муніс этшаджык, колӧ ӧтувтчыны быд торъя газет судзӧдысьлы да ӧтпырйӧ (ӧтик переводӧн) ыстыны деньгасӧ, сӧмын колӧ быд мортлысь ним-овсӧ перевод вылас пасйыны.

Позьӧ судзӧдны кооперативъяс пыр. Та ногӧн ещӧ бурджык. Абу кӧ сьӧмыд, ну лавкаад мый сэні босьтӧны (нянь-ӧ, вый-ӧ, ур ку-ӧ), 50 ур дон тӧлысь кежлӧ, да висьтав: «Тайӧ, шу, вайи „Югыд туй“ газет вылӧ». Мед сэні пасъясны адрестӧ, сэсся ыстасны редакциялы гижӧд: кытчӧ, кутшӧм нимъяс вылӧ колӧ мӧдӧдны газет, дыр-ӧ кежлӧ, газет и кутас воны — оз ков весиг лавкаыдлы сьӧмсӧ карӧ ыстыны, сы йылысь редакция лӧсьӧдчас тані Обсоюзкӧд, сӧмын мед ӧтпырйӧ лавкаыд юӧртас Обсоюзлы: уна-ӧ дон босьтӧма крестьяналысь тӧвар газет вылӧ.

Тадзи кӧ дона (быд керка юрӧ) газет судзӧдны, гӧльджыкъяс вермасны ӧтувтчӧмӧн (складчинаӧн) судзӧдны. Шуам, дас керкаысь ӧтувтчисны 5 урӧн (сӧмын ӧд 5 ур!) керка юрысь да чукӧртісны сьӧмӧн ли, мыйкӧ вузӧсӧн ли, сэсся кодкӧ ним вылӧ и шуисны ыстыны газет. Водзӧ позьӧ вӧчны сідзи жӧ, кыдзи тай войдӧрсӧ висьталӧма тані: поштаӧн сьӧмтӧ мӧдӧдны, либӧ кооперативыд пыр.

Со ӧд кутшӧм кокньыда и позьӧ газеттӧ судзӧдны деревняад!

Нолтӧ, босьтчылӧй, коми крестьяна, югдӧдчыны!

Редакция корӧ Обсоюзӧс тайӧ статья сертиыс сетны быд кооперативлы гижӧд, кыдзи бурджык лӧсьӧдчыны газет вылӧ сьӧм босьтавны да редакциякӧд лӧсьӧдчыны. Ми надейтчам: Обсоюз татшӧм бур уджысь оз кут петитчыны.