ЗЭВ СЬӦКЫДА МУНӦ ВОТ МЫНТӦМ

Тэрмасьӧй, крестьяна!

Миян Коми обласьтын декабр 1-й лунӧдз колӧ мынтыны сельскокӧзяйственнӧй налог (вот) — 75.000 шайт.

Ӧнӧдз (ноябр 15-ӧд лунӧдз) мынтӧма сӧмын 21.823 шайт.

Этша. Вывті этша.

Срок коли зэв нин дженьыд — дас лун! Толькӧ дас лун!

Сэсся нӧ мый лоӧ, срок кольӧм бӧрас?

Сы бӧрын кутасны воттӧ мырдӧн перйыны.

Недоимка дон гижасны овмӧстӧ, эмбуртӧ. Ӧтчыд кӧ он мынты шыасьӧм бӧрын — штрапуйтасны 25 шайтӧдз. Мӧдысь кӧ он мынты — сетасны судӧ. Суд вермӧ та йылысь судитны пукӧдны квайт тӧлысьӧдз, либӧ став овмӧстӧ ли, мыйкӧ мында ли босьтны (конфискуйтны), либӧ кык мында воттӧ мынтыны.

Кор унаӧн петитчӧны (ӧткажитчӧны) вот мынтӧмысь — сэки ещӧ чорыда судитӧны: главнӧйяссӧ-ыштӧдысьяссӧ во чӧж пукӧдны мырддьӧмӧн став овмӧссӧ, мукӧдъяссӧ — квайт тӧлысь кежлӧ, либӧ кык мында вот мынтыны.

Со мый вермас лоны, коді оз мынты вот ассьыс пайсӧ срок кежлӧ.

Коми крестьяна! Бурджыка мӧвпыштӧй та йылысь, энӧ воштӧй асьнытӧ мырдӧн вот перйӧмӧдз, мынтӧй вотнытӧ срок кежлӧ!

Вот абу уна, оз ӧтпырйӧ корны ни — позьӧ кокньыда мынтыны.

Со тай нӧ Украинаса крестьяна ноябр 1-й лунӧдз мынтӧмаӧсь нин джынсьыс унджык (55 прӧчент), мыйта колӧ вӧлі ставсӧ вонас мынтыны. На моз жӧ колӧ и миянлы вӧчны.

Колӧ мынтыны весиг став воттӧ ӧтпырйӧн, сэки оз нин ков сэсся мӧдысь тӧждысьны вот мынтӧм йылысь. Сэки и асланым Сӧвет власьтлы зэв ыджыд бур вӧчам. Сэки миян государство бурджыка вермас бергӧдчыны, ёнджыка кутасны миянкӧд лыддьысьны озыр государствояс.

Мынтӧй, крестьяна, вотнытӧ срокӧдз!