Колӧ вӧдитны уна картупель

Ми, коми войтыр, абу велалӧмаӧсь чӧсмасьны. Медтыкӧ нянь вӧлі унджык-а, мукӧдторйыд веськодь.

Немеч бара мӧд ног сёрнитӧ: сылӧн медтыкӧ унджык картупель вӧлі. Картупельнад сійӧ бура нин олас, ёна чӧсмасяс. Сэки сылӧн лоӧ пӧттӧдзыс порсь яй, йӧв, вый. Картупельтӧ сійӧ сэки сёяс вый, гос, йӧв пытшкын. Сы вӧсна немеч ассьыс ичӧтик мусьыс унджыксӧ картупель улӧ лӧсьӧдӧ. Сылӧн картупельыд медмуса тор, сійӧ кужӧ сэтысь чӧскыд, пӧтӧс сёян лӧсьӧдны. Нёль-вит мында уна нянь дорысь сійӧ бурсӧ босьтӧ. 213 метр ыджда муад медуна пыдди нин воас 82 килограмм няньыд. Картупельыд сэтчӧ жӧ артмас 1228,5 кг дорысь унджык. 1228,5 кг картупельыдлӧн пӧтӧсыс лоӧ 327,6 кг нянькӧд воча.

Зэв бура воас картупель, пуктан кӧ ид бӧрын, торъя куйӧд оз весиг ков; зэв бур лоас, тулыснас кӧ гӧрӧм водзвылас сійӧ мусӧ верман киськавны 455 кв. метр. улӧ 32,64 кг пӧим. Сэтысь картупель ёна быдмӧ, котырмӧ. Картупель улӧ му колӧ гӧрны кыкысь. Войдӧр арын пыдіджык гӧрны, кольны пинёвттӧг. Водз тулысын пинёвтны да мӧдысь гӧрны, мӧдысь тулысын гӧрны пуктӧм водзвылас му шоналӧм бӧрын. Бурджык вылӧ картупель пуктӧны плуг улӧ, гӧр улӧ. Кыкысь гӧрыштӧм костӧ колӧ пуктыны да оз бӧрӧздаас ков картупельтӧ шыблавны, а пуктавны бокас, мед сӧмын 5 см пыдӧ лоӧ муас.

Мыйӧн муртса мыччысяс корйыс, колӧ пинёвтны мусӧ. Сэсся 30 см кымын судта быдмӧм бӧрын колӧ мудйыны, мудйысяныс эм нарӧсьнӧй. Колӧ кӧ уна картупель воӧм, лун 10–12 мысти мӧдысь позьӧ мудйыны. Мудйысянсӧ позьӧ артельӧн босьтны карысь ЕПО пыр. Картупель бӧрын позьӧ кӧдзны бара ид куйӧдтӧг. Со кутшӧм буртор картупельыд. Чӧскыд пӧтӧс сёян мортлы сетӧ, порсьясӧс тшӧгӧдӧ, мӧсъяслысь йӧв содтӧ, мутӧ небзьӧдӧ, вынсьӧдӧ.

Унджык кӧ колӧ тӧдны та йылысь, юасьӧй агрономъяслысь.