ВИДЗ БУРМӦДӦМ
Кымын уна турун, сымын уна скӧт, куйӧд, нянь. Тайӧ быд видз-му уджалысь тӧдӧ эськӧ да, сӧмын оз пыдди пукты. Быдӧн мырсям, тӧждысям, му дӧзьӧритам, огӧ весиг мӧвпыштӧй, мый сайын бурлуныс мулӧн. Мутӧ ми вынсьӧдам, небзьӧдам, быд ног дӧзьӧритам. Видз вылӧ омӧля видзӧдлам. Кодсюрӧ сӧмын мыръяс гашкӧ перъявласны, вутшъяс вундавласны, лӧпъяс весыштласны, кустъяс керыштласны. Виддзыд ӧд му моз жӧ дӧзьӧр виччысьӧ. (Оз позь ыжӧс ӧтарӧ шырны).
Воысь воӧ видзьясыд омӧльтчӧны, топалӧны, тырӧны, таляссьӧны. Сынӧдыс оз кут ветлӧдлыны мусинӧдыс, став бур турун вужйыс пӧдас, кулӧ, мыччысяласны лёк турунъяс: шомкор, эжӧр, куз. Сэтшӧм видзьяс вутшкӧссясны, омӧльтчасны. Сэсся тулыс-арнад скӧтӧс видзӧмӧн, тальӧдӧмӧн дзикӧдз нин помалӧны видзьястӧ. Крестьянин норасьӧ видз тшыкӧм вылӧ, весиг эновтӧ, выльлаӧ кутчысьӧ видз вӧчны.
Бурджык лоӧ, важсӧ кӧ бӧр вынсьӧдан, бурмӧдан, этшаджык вын сэтчӧ бырӧ. Медвойдӧр колӧ видзтӧ небзьӧдны муӧс моз. Быд тулысын му сывтӧдзыс на колӧ кӧрт сьӧкыд пиняӧн пинёвтны, мед став нитшкыс шедалас, нетшкысяс, сэки турун вужъясыд личмунӧны, бӧр ловзяласны бур турунъясыд. Мукӧд полӧны, сьӧдӧдз пинёвтӧм бӧрын пӧ оз пет турун. Петас, нӧшта кык мында унджык быдмас туруныс. Видзтӧ мутӧ моз жӧ колӧ вынсьӧдлыны. Турунъясыд ӧд сёянтӧг оз жӧ быдмыны. Некор вынсьӧдлытӧгыд нӧ кытысь турунлы сёянсӧ босьтны? — Некысь. Сійӧн ӧд и бырӧ туруныд. Вынсьӧдны позьӧ водз тулысын пӧимӧн киськалӧмӧн. Сыысь бур — верман кӧ морт куйӧд кизьӧртӧм ваӧн киськавны. Вывті кӧ нин ёна тшыкӧма виддзыд, сэки оз отсав пинёвтӧмыд ни пӧимӧн киськалӧм, вермас дзикӧдз кушмыны. Сэки колӧ видзтӧ муӧс моз жӧ гӧрны да турун кӧдзны. Арсянь видз гӧрны, сэсся ӧти воӧ шойччӧдны коськӧм улын. Сы бӧрын кӧдзны нянь турункӧд. Нӧшта бур лоӧ верман кӧ куйӧдыштны. Тадзтӧ виддзыд коськӧмнад, няньнад шойччыштас да бара кутас уна турун вайны.
Крестьянин вермас шуны: видзтӧ кӧ пӧ нӧ ме гӧра коськӧм улӧ, кысь турунсӧ босьта? — Оз ӧд ков став видзтӧ ӧтпырйӧ гӧрны, ичӧтик торъясӧн позьӧ, надзӧникӧн, вочасӧн.
Турун кӧйдыс позьӧ судзӧдны агрономъяс пыр, налысь юасьӧмӧн кӧдзны.
Водз тулыс, сёр ар весиг оз позь скӧтӧс видз вылӧ лэдзны. Васӧд, небыд видзьястӧ таляласны, скӧт коктуйӧссяс, ва гӧптасяс, сэсся нитшкасяс, вутшкӧссяс. Сы кындзи скӧт сёйӧ медбур турунсӧ, омӧльсӧ кольӧ, найӧ сэсся воасны, кӧйдыс гылӧдӧны водзӧ кежлӧ, сідзи видзьясыд омӧльтчӧны. Некӧн нин кӧ скӧтӧс видзны, позьӧ сӧмын кос поводдя дырйи ытшкӧм бӧрын, мед оз талясь. Медся нин омӧль тулысся талялӧмыд.
