ЧЕЛЯДЬ БЫДТӦМ
Быд бать-мамлы колӧ дзоньвидза, бур, сюсь челядь. Велӧдчытӧм прӧстӧй йӧз пыр кевмӧны енлы, корӧны бур мывкыд да дзоньвидзалун. Быд висьӧм, быд омӧль, быд бур чайтӧны енсянь лоиг; сы понда уна шог йӧз вывті мунӧ быдтысигад, олігад. «Сідзи пӧ ен шуӧма». Ставыс эськӧ ас вӧснаным. Унаторйысь мыжа бать-мам челядь водзын.
Дзоньвидза челядь вермасны лоны сӧмын дзоньвидза бать-мамлӧн. Висьлӧс бать-мамлӧн, вывті томъяслӧн, пӧрысьяслӧн оз вермы тыр дзоньвидза челядь лоны. Вина юысьяслӧн, лёквисьысьяслӧн оз вермыны лоны тыр вежӧра дзоньвидза челядь. Унджык висьлӧс, йӧй челядьыс му вылас вина юысь да лёквисьысь бать-мамлӧн. Мукӧддырйи эськӧ вина юысьыс ачыс оз вись, нэмыс дзоньвидза олас да челядьыс чужӧны йӧйӧсь, рӧдимечаӧсь, немӧйӧс, пельтӧмӧсь, синтӧмӧсь. Кага артмигас кӧ бать-мамыс код юраӧсь вӧліны (сэсся кӧть некор эз юлывлыны) кагаыс оз жӧ дзоньвидза ло. Сійӧн вина юысьяслы, лёквисьысьяслы оз весиг позь гӧтрасьны.
Медвойдӧр челядьлы колӧ бур, пӧтӧс сёян да сӧстӧм сынӧд^Сынӧд — воздух./^. Челядьӧс ньӧтчыд оз ков винаясӧн, сук тшайӧн да суръясӧн юктавны.
Мукӧд бать-мам кынмӧмысь полӧм вӧсна тӧвбыд оз лэдзлыны дука керкасьыныс челядьнысӧ. Ывлавылӧ петавтӧгыд челядь омӧльӧсь лоӧны: сынӧдтӧгыд ӧд дзоньвидзалуныд оз вермы лоны. Челядьлы сэсся колӧ котралӧм, вӧрӧм, горзӧм, ворсӧм. Вынысь вывті сьӧкыд удж тшыкӧдӧ челядьӧс. Налӧн сэтысь сьӧлӧмныс омӧльтчӧ, чужӧмныс быгалӧ, вынтӧмӧсь быдмасны. Ньӧтчыд оз ков лёкавны, скӧравны челядь вылӧ, весиг ас костад оз ков увгыны челядь дырйи.
Кесйӧдлыны найӧс колӧ бурӧн. Оз ков самӧвӧлитны. Кывтӧ колӧ кутны челядь водзад. Ӧтчыд мый шуан, эн веж.
Видчӧмысь да нӧйтӧмысь челядь сӧмын лёкмӧны да йӧймӧны.
Некор оз ков челядьӧс повзьӧдлыны, оз ков висьтавлыны поланторъяс.
Куш кывйӧн бур вылӧ челядьӧс он вермы велӧдны. Налӧн ӧтар пельӧдныс пырӧ, мӧдарӧдныс петӧ. Сӧмын верман найӧс велӧдны аслад олӧмнад. Аддзӧны кӧ челядь гырысьлысь, бать-мамлысь бура олӧм, асьныс велӧдчӧны сідз жӧ овны. Кутшӧмӧсь бать-мам, сэтшӧмӧсь и челядь лоӧны. Бать-мам кӧ мӧда-мӧднысӧ нинӧм туйӧ пуктӧны, челядьныс сідз жӧ нинӧм туйӧ кутасны пуктыны найӧс. Пинясьысь, косясьысь, ёрччысь, матькысь бать-мамлӧн и челядь сэтшӧм жӧ лоӧны.
«Мый пӧ тай кӧдзан, сійӧс и вундан».
