АБЪЯЧОЙЫН

Комсомоллӧн удж

«Мый кыв вылын, сійӧ и удж вылын», — тадзи шуӧны абъячойса комсомолечьяс и сідз и вӧчӧны. Найӧ гожӧмнас ытшкигӧн ӧти отсӧг (субботник) вӧчисны, вундігӧн кыкӧс: ӧтисӧ — доброволечӧ мунӧм комсомолеч семьялы Шӧр спас лунӧ; кодыр став йӧзыс вӧліны вичкодорса сура праздник вылын — найӧ мунісны сьылігтырйи вундыны, петкӧдлісны, мый оз кӧсйыны гортса уджсӧ мунӧм ёртлысь эновтны, поп праздник оз тӧдны; мӧдӧс — уджалысьтӧм красноармееч семьялы.

Тайӧ ӧтдор, уджалісны асланыс мыччӧдлан капустник (показательный огород) вылас, весалісны ёгъяс, бырӧдісны зелляясӧн, пызйӧмӧн лёльӧ-гагйӧс, пуктас сёйысьясӧс. Тайӧ уджсӧ нуӧдіс абъячойса агрономыс. Ӧні босьтісны пуктасъяссӧ. Быдмӧмаӧсь бура, сӧмын кодкӧ лёк морт быдмигкості нетшкӧма град джын морков да сымда жӧ ӧгуреч. Пуктас вузалісны и сійӧ сьӧм вылӧ судзӧдӧны газетъяс да нигаяс.

Сэсся комсомолечьяс кӧдзисны, машинаӧн весалӧм-бӧрйӧм кӧйдысӧн, турунъяс (бобӧнянь).

Ӧтувтісны челядьӧс пионерскӧй группаӧ и индісны ас пытшсьыныс ёртӧс сійӧ уджсӧ нуӧдны.

Сувтӧдісны кык спектак и судзӧдісны челядь журнал, чукӧртчывлӧны сёрнитны-тӧлкуйтны, сьывны, ворсны.

Арсянь, удж эштӧдӧм бӧрын, кутчысисны велӧдчан удж (воспит. работа) дінӧ.

Селькор «М».