УЛЛЯНАСА УЧСОВХОЗЫН

Уллянаын профсоюз (Всеработземлес) уджалысьяслӧн лоӧма важӧн нин, 1920 воӧ. Ӧніӧдз велӧдчан удж омӧля вӧвлӧма, сӧмын тӧдлӧмаӧсь во пиас кык-куим чукӧртчылӧм. Клубӧ волӧмаӧсь гежӧда, сэсся клубыс пӧдласьлӧма нин.

Таво юнь тӧлысьын воссис клуб выльысь, удж босьтчысджык, ӧні уджалысьяс сійӧс лыддьӧны шойччанінӧн. Ӧбед бӧрын шойччигӧн, рытын век локтӧны клубӧ лыддьысьны газетъяс, книгаяс, бур сёрни кывзыны, сёрнитны, сьывны-ворсны.

Вывті радейтӧны коми газет, книга, коми сьыланкывъяс, сӧмын миян этша нигаыс, тӧв кежлӧ, гашкӧ, оз вунӧдны миянӧс областнӧй да уезднӧй союзъяс да ыстасны.

Вӧлі неважӧн чукӧртчылӧм уджалысьяслӧн: Шуисны пырны аэроплан стрӧитысь чукӧрӧ (ОДВФ), сэсся зэв бура босьтчыны асьнысӧ велӧдны клубын лыддьысьӧмӧн. Шуӧны: миянлы пӧ колӧ быдтор тӧдны: мый му вылас и миян Сӧветскӧй Россияын керсьӧ, кыдз му-видз бурджыка уджавны. Олӧмад агрономъяскӧд уджалӧны и шуӧны: аддзам пӧ став бурсӧ кужӧмнад видз-му уджалӧмсьыд и водзӧ пӧ велӧдчам.

Волӧны клубӧ и чукӧртчылӧмъяс вылӧ регыд кежлӧ уджавны локтӧм йӧз (поденные).

Сёянін эм ӧтласа (столовая), сійӧ ӧні пельк, сёян уджалысьяслӧн бур. Удж вылӧ уджалысьяс бурӧсь, зільӧсь. Удж йылысь сӧветлысь лӧсьӧдан закон тӧдӧны.

Г. Микушев.