ПОЁЛЫН

(Визин карулын)

Видз-му юкӧм йылысь.

Вӧлӧсьт зэв ыджыд: олысь лыд 3265, кӧзяйство лыд 904. Му уджалӧны куим пельӧ юклӧмӧн (трехполье). Му-видз уджалӧм сувтӧдӧма омӧля. 1922 воын му-видз омӧлика вештавлісны, мерайтлывлісны став вӧлӧсьтыс ӧтвылысь, юклісны десятаӧн. Муяс гырсьӧдӧм пыдди — зэв ёна посньӧдісны. Прамӧй бур видз-му нига исполкомын абу, эм сӧмын омӧлик (чернӧвӧй), ставсӧ дзугӧма. Выль нига лӧсьӧдны медавлісны секретарӧс, сійӧ донсӧ босьтӧма водзвыв, сэсся лӧсьӧдтӧгыс муніс Визинӧ служитны.

Ӧні Исполком кӧсйӧ выльысь кутчысьлыны тайӧ удж вылас — мерайтчыны. Мерайтчӧм кӧ лоӧ — колӧ мерайтны выль ногӧн, колӧ муяс машиннӧй тӧвариществояскӧд, гӧль крестьянаыскӧд ӧтластитыштны.

Переселенньӧ.

Колян восянь 76 крестьянин мунісны Сибырӧ став семьянаныс (283 морт кымын), ӧні ещӧ муналӧны. Мунысьяс шуӧны, миянлы пӧ тані абу тырмидз му-видз, он пӧ вермы пӧткӧдчыны, джын олӧмыд Сибырын жӧ мунӧ (ветлывлӧны вурсьыны).

Зэв на ми пемыдӧсь, велӧдчытӧмӧсь, ог кужӧ бур ногӧн (выль ногӧн) му уджавны агрономъяс тшӧктӧм серти, сійӧн и ог вермӧ пӧткӧдчыны.

Сентябрын организуйтчис кредитнӧй тӧварищество. Войдӧрсӧ гижсьылісны 75 член, ӧні пырӧмаӧсь 128 член нин. Сійӧ лӧсьӧдны ёна отсаліс велӧдысь Михеев ёрт. Сійӧ жӧ сюри членӧ-счетоводӧ правленньӧас.

Колян во косялісны пашня ӧтвылӧн 6 морт 3½ десятина, таво кӧдзисны сю 29 пуд.

Сіс.