ОБСОЮЗЫН
Локтан тӧв кежлӧ Обсоюзлӧн лои ньӧбӧма быдсяма колан тӧваръяс нёльсё вит сюрс (тысяча) шайт дон. Унджыкыс ситеча-няня тӧваръяс (мануфактура да бакалея). Пӧшти ставыс нин воис Сыктывдінкар пристаньӧдз (ӧтик сюрс пуд сакар сӧмын нин локтӧ паракодӧн). Мыйтакӧ мӧдӧдӧма Абъячойӧ, Кулӧмдінӧ, Емдінӧ да кольӧдӧма Айкатылаӧ Удораса кооперативъяслы. Мый Обсоюз кӧсйис таво пыртны обласьтӧ ас план сертиыс, пӧшти ставыс лои ньӧбӧма дай вайӧма. Туй пуксьӧм бӧрын деревняса кооперативъясыд пыр жӧ и вермасны босьтавны аслыныс мый колӧ. Зэв колӧ, мед эськӧ водзвылысь кооперативъясыд сьӧмнысӧ сетасны Обсоюзлы, мед сійӧ бара жӧ вермас водзвылысь лӧсьӧдны коланторсӧ.
Ньӧбӧма сюрс пуд сакар Одессаысь да вӧчӧма сёрни (договор) сакар тресткӧд кык сюрс пуд сакар вылӧ. Сійӧ сакарыс воас татчӧ декабр ли январ тӧлысьясӧ, тӧвся туйӧн нин.
Ньӧбӧма сэсся эмалированнӧй пӧсуда, кыксё самӧвар, кабала тӧваръяс, да ещӧ мукӧд коланаторъяс.
Ньӧбигад Обсоюзыдлы, дерт, ковмис и удждысьны кытысь позис. Уджнадтӧ сетӧмаӧсь: Центросоюз — кыксё сюрс шайт, Всекобанк — ветымын сюрс, да ещӧ мукӧд (трестъяс) — шайт сё кызь сюрс гӧгӧр.
Сэсся Обсоюзыд ньӧбліс кызь вит порсь, еджыд йоркшир рӧдысь, бур рӧд вылӧ крестьяналы 4 порсь сетӧма Абъячойӧ, 3 — Леткаӧ, 3 — Нювчимӧ, 4 — Пальӧ, 3 — Помӧсдінӧ. Мукӧдсӧ Обсоюз кӧсйӧ сетны Сыктывдінкарса Еполы, Визинсалы да Спаспорубсалы.
Тайӧ тӧлысьясӧ вузалӧма крестьяналы бура уна быдсяма машинаяс (вартан, гӧран, кӧдзан да мукӧд пӧлӧс).
Сэсся Обсоюз ӧні ньӧбасьӧ бур кодзтӧм ӧшъяс рӧд вылӧ Емваса рӧдысь «случнӧй пунктъяс» вылӧ.
Кык ӧш мӧдӧдӧма нин деревняясӧ.
Вӧр уджалысьяс пондасны ӧтувтчыны профсоюзын, кыдзи прӧстӧй уджалысьяс (рабочӧйяс) — сійӧ лоӧ выгӧднӧджык крестьяналы.
Мунӧ сэсся сёрни Северолескӧд договор йылысь. Сійӧ договор кузя таво пӧшти став вӧр лэдзысь-кылӧдысь уджалысьлы колан тӧваръяссӧ пондас сетны Обсоюз ачыс, деревняса кооперация пыр. Северолес сы понда Обсоюзлы сетӧ ассьыс тӧварсӧ дай ещӧ сетӧ сьӧм. Сёрниыс абу на помасьӧма, воасны ли сӧгласас — огӧ на тӧдӧй.
Сэсся Обсоюз корӧ центрысь деревняса кооперативъяслы государствосянь деньгаӧн отсӧг (дотация), мед найӧс ёнмӧдны водзӧ вылӧ уджавны бурджыка.
Сёрниӧн лӧсьӧдӧма центрсянь колан нигаӧн (литератураӧн) снабдитан удж. Ӧні литература миян пондас воны татчӧ бура.
Уджъяс Обсоюзын мунӧ водзысь водзӧ. Колӧ, мед эськӧ деревняса кооперативъясыд газет пыр висьталасны, кыдз налӧн уджыс мунӧ. Ӧнӧдз зэв тай омӧля мыйлакӧ найӧ гижлісны-а?
Биа из.
