МУ ВЫЛЫН НЕКУТШӦМ «ЧУДЕСА» АБУ

Эм быдлаын сӧмын: мырсьӧм (уджалӧм), велӧдчӧм, машинаӧн удж нуӧдӧм

Лоас кӧ кос во, вывті зэра во, нянь-турун артмытӧм во — крестьяна лыддьӧны сійӧс «чудесаӧн», енсянь ыстӧмӧн грек понда да коммунист понда; висьтав кӧть эн налы, нинӧм оз веритны.

Агрономия нигаясын, газетъясын гижӧны: кос во лоӧмын ни, зэра во лоӧмын ни, нянь артмытӧмын ни, абу некутшӧм чудеса; ен ни, дявӧл ни сійӧс оз ысты миянлы. Наука (кузя велӧдчӧм, видласьӧм) висьталӧ, быдӧн сійӧ овлӧ му пӧтшва понда, климат понда, сідзжӧ медся ёна асланым кужтӧмла, огӧ кужӧй веськӧдлыны, вӧдитчыны ывлавывнас (природанас).

Сэтшӧм оланінъясын, кӧні йӧзыс кымын ёна велӧдчӧмаӧсь, ёнджыка тӧдӧны ас гӧгӧрсӧ, ывлавывсӧ, ёнджыка тӧдмасьӧмаӧсь велӧдӧмъяскӧд, машинаӧн уджалӧмъяскӧд, сэні сымын этшаджык овлӧ нянь-турун артмытӧмыс, тшыгъялӧмыс йӧзлӧн.

Кос воясӧ йӧзыс сэні кужӧныджык аслас юр вемнас да мырсьӧмнас кутны лӧсьыдджыка ассьыныс кӧзяйствосӧ, ӧтмозджык видзны му пӧтшваас зэр-лымвасӧ.

Нинӧкутшӧм молебенӧн ни, соборӧн ветлӧмӧн ни он вермы мынтӧдчыны кос восьыд. Сэтшӧм кӧлдуйтӧмъяснад да кевмӧмъяснад кӧзяйствотӧ не бурмӧдлыны.

Некытӧн свет вылын кутшӧмкӧ ен вынӧн вӧчӧм чудеса абу. Быдлаын эм сӧмын: мырсьӧм, велӧдчӧм, машина удж!

Ветлы кӧть эн тэ аслад му вылӧ ӧбразъяснад, сетав кӧть эн поп-дякыдлы кольктӧ куд тырӧн, мукӧдтор, весиг ӧстатки пызьтӧ семьяыдлысь, эн вунӧд ӧтитор: «быдтор вермысь енмыд» пыр пондас чӧв овны, кор тэ кос воясӧ, корӧм выйӧ воӧм мысти, кутан сылысь корны чудеса — бура нянь артмӧм, сійӧ тэнсьыд немтор оз кывзы.

Любӧй поп, коді сӧветуйтӧ крестьянскӧй кӧзяйствоӧ быдпӧлӧс кӧлдуйтанторсӧ, бурджык пыдди пуктӧ ыстыны ассьыс ныв-писӧ агрономия школаӧ (кӧні велӧдӧны видз-му уджавны), эн пов — попыд оз кӧсйы сетны налы сэтшӧм жӧ кӧлдуйтӧм сӧветсӧ, кыдзи крестьяналы.

Крестьяналы медвойдӧр колӧ агрономияӧ велӧдчӧм (кыдзи бурджыка видз-му уджавны), сэсся бур машинаяс, ӧтув мырсьӧм да поп-дяк дзугльӧдлытӧм югыд юр вежӧр.

Ӧні, кыдзи гижӧны газетын, крестьяна уналаын нин шуасьӧны со кыдзи:

Миянлы пӧ — гижӧны асланыс приговоръясын — бурджык мынтыны велӧдӧмысь да машинаяс лӧсьӧдӧмысь, поп-дяклы ладанысь да кӧлдуйтӧм шомысь мынтӧм дорысь.

Миянлы пӧ ёнджыка колантор судзӧдны вӧлӧсьт вылӧ кӧть ӧти бурджык агрономӧс, асланым шоша вылӧ поп-дякӧс пуксьӧдӧм дорысь.

Аслад кӧ велӧдчӧмыд оз судзсьы — колӧ велӧдчыны водзӧ. Сӧмын некор ен вылӧ надейтчыны оз ков.

Нянь уджалысь.