МИ ЁНМАМ

Франция республикалӧн правительство признайтіс Сӧвет правительствоӧс. Ӧні став Европаса ён государствоясӧн Сӧвет правительство лои признайтӧма.

Октябр революция бӧрын ставмувывса буржуазия чорыда босьтчывліс бырӧдны медводдза рабочӧй-крестьяналысь власьтсӧ, чайтіс кокньыдикаӧн вермыны.

Медся лёкысь тышкасис Сӧвет Республикаяскӧд Францияса буржуазия, сылы медся ёна уджйӧза вӧлі сар правительство, сійӧ уджйӧзсӧ кӧсйис перйыны.

Сӧвет Республикаясса рабочӧй-крестьяна эз сетчыны.

Тышкасьӧмысь буржуазиялы лои дугдыны. Сы бӧрын кӧсйисны Сӧвет Республикаясӧс торйӧдны мукӧд государствояскӧд тӧргуйтӧмысь.

Сӧветъяскӧд тӧргуйттӧг асланыс олӧмныс пондіс торксьыны: миянлысь тӧвар нутӧг да ассьыныс тӧвар миянӧ инавтӧг налӧн пабрик-заводъясныс пондісны дугдыны уджалӧмысь, уна сюрс рабочӧйяс уджтӧг колины.

Мед ассьыныс пабрик-заводъяссӧ босьтчӧдны, заграничаса государствояслӧн лои Сӧвет правительствоӧс признайтны. Медвойдӧр Германия, сы бӧрын Англия, сэсся мукӧд гырысь и посни государствояс пондісны миянкӧд тӧргуйтны, сӧмын Франция (ыджыд государствояс пытшкысь) эз кӧсйы Сӧвет правительствокӧд сёрнитны.

Сӧвет Республикаяслӧн эмбур кыпӧдӧм тӧлысьысь тӧлысьӧ век ӧтарӧ босьтчис, Сӧвет власьт лунысь лунӧ ёнджыка вынсялӧ, ёнмӧ.

Сійӧн сэсся и Франциялӧн лои Сӧвет правительствоӧс признайтны да босьтчыны сёрнитны тӧргуйтӧм йылысь.

Колины сӧмын Румынияса бояра (миянлысь Бессарабия гусялысьяс), Голландияса купечьяс, Швейцария да Чехословакия. Налӧн регыд жӧ лоӧ признайтныныс.