КЫДЗИ КОЛӦ УДЖАВНЫ КРЕДИТНӦЙ ТӦВАРИЩЕСТВОЯСЛЫ

Уна ыджыд удж эм сиктъясын Кредитнӧй Тӧвариществояслы, колӧ сьӧлӧмын ӧтувтчӧмӧн кутчысьны.

Колӧ Тӧвариществояслы унджык шленъяс чукӧртны, колӧ налы висьтавлыны, кыдзи Сӧвет власьт крестьяна понда тӧждысьӧ, отсалӧ налы овмӧссӧ кыпӧдны и сьӧмӧн, и машинаясӧн.

Колӧ Тӧвариществолы и унджык пайяс шленъяссянь чукӧртны. Кымын унджык ас сьӧм чукӧрмас, сымын унджык Тӧварищество сьӧм и бокысь вермас шедӧдны, унджык шленъяслы отсӧг сетны.

Сы бӧрын колӧ став шленъяссӧ корлыны да юасьны, кодлы кутшӧм во гӧгӧр кежлас ковмас отсӧг.

Юасьнысӧ жӧ колӧ сы вӧсна, мед ачыс Тӧвариществоыс кутас тӧдны водзысянь, уна-ӧ мый лӧсьӧдны, мый ньӧбны ковмас корны Обласьтувса Сельскокӧзяйственнӧй Банксянь. Мӧд ногӧн кӧ шуны, колӧ лӧсьӧдны аслыныс уджалан план. Сійӧ планас колӧ висьтавны, уна-ӧ ковмас во гӧгӧрнас сетны шленъяслы вӧв ньӧбӧм вылӧ, мӧс ньӧбӧм вылӧ, уна-ӧ ковмас видз-му уджалан машинаяс вылӧ, уна-ӧ во гӧгӧр кежлас ковмас сю кӧйдыс, турун кӧйдыс, уна-ӧ ковмас му-видз паськӧдӧм вылӧ, прокатнӧй пунктъяс вылӧ, кӧйдыс весалан машинаяс вылӧ. Мед сійӧ план серти Коми Банкыс кутас тӧдны водзджык, мыйта ковмас лӧсьӧдны сьӧм, кӧйдыс, машинаяс быд Тӧвариществӧяслы, став Обласьтлы, мед сійӧ вермас корны сьӧмсӧ Ставрочмувывса Сельскокӧзяйственнӧй Банксянь и мукӧдласянь.

Колӧ Кредитнӧй Тӧвариществолы видзӧдлыны, абу-ӧ шленъяс костаныс ковтӧм войтыр, важ вир юысьяс, кулакъяс. Сюрӧны кӧ сэтшӧмъясыс, колӧ ылӧджык найӧс вӧтлыны, мед оз пондыны пӧльзуйтчыны сьӧмнас да сюйсьыны правленньӧас.

Колӧ кредитнӧй Тӧвариществолӧн отсавны шленъясыслы прӧмыснысӧ, шабдінысӧ, выйнысӧ ӧтувтчӧмӧн донӧнджык вузавны, отсӧг сетны и сы пӧраӧ, кор шленыс нуждаысь донтӧм донӧн вузалӧ урсӧ, выйсӧ, мӧссӧ, вӧвсӧ, няньсӧ. Сы пӧраӧ колӧ залогӧ босьтлыны сылысь вузаланторсӧ и удждывны бергӧдчытӧм пӧра кежлас сьӧм. Кор воас дона пӧраыс прӧмысыслы, сылӧн лоас сьӧмыс, бӧр босьтас залогсӧ, мынтас уджйӧзсӧ.

Колӧ Тӧвариществолы сідзи лӧсьӧдны, мед налӧн шленъясыс сьӧмнысӧ оз гортын, розьын да гырничьясын куйлӧдны, а мед сетасны Тӧвариществоыслы жӧ пӧльзуйтчыны да мукӧд нуждайтчысь шленъяслы овмӧс кыпӧдӧм вылӧ уджӧн сетлыны. Сэки лоас ӧтарыслы и мӧдарыслы бурджык. Тӧвариществолы ковмас этшаджык сьӧмсӧ банкысь удждыны, ичӧтджыка прӧчентсӧ мынтыны, а удждысь шленъяслӧн сьӧмыс кутас прӧчент вайны да и овмӧс кыпӧдны отсавны. Долыдджык лоӧ шленъяслы и государстволы — унджык сьӧм кутас ветлыны. Колӧ висьтавлыны ас шленъясыслы, мый сылы уна уджӧн сетӧ Банк да дзик оз пов, сідзжӧ и шленъясыслы повны нинӧмысь, сьӧмыс сылӧн оз вош, а кутас йӧзлы буртор вӧчны, овмӧс кыпӧдӧм вылӧ отсӧг сетны. Овлӧ ӧд сэтшӧм пӧраяс, кор крестьянин видзӧ сьӧмсӧ тӧлысь куим-нёль, кытчӧдз сылы оз ковмы, видзӧ пӧльзатӧг муын да гырничын.

Тайӧ уджсӧ лӧсьӧдны колӧ тӧждысьны став Тӧвариществояслы, став шленъяслы. Кор ӧтувтчӧмӧн кутчысям тайӧ уджсӧ вӧчны, ёрта-ёртлы отсӧг сетны, быдӧнлы лоӧ бурджык.

Климушев Яков.