АЙКИНЧИ

Олӧм Айкинаын пуӧ. Лунысь-лун айкинчи думайтӧны мыйкӧ выльӧс вӧчны. Служащӧйяс оз тӧдлыны некутшӧм шойччӧм, быд лун собранньӧяс вылын крестьяналы висьтавлӧны мый-нибудь йылысь.

Айкинаын вит нога кооперативнӧй организация. Быд крестьянин кутшӧмкӧ кооперативын шленын. Медбура уджалӧ потребительскӧй кооператив. Юралысьясыс сэні зэв шань йӧз. Потр. кооператив югыд би лӧсьӧдіс тӧвариществолы, став ас шленъяссӧ пыртӧдіс сійӧ тӧварищ. и мынтіс на пыдди членскӧй взнос.

Ёна ошкӧны айкинчи и Коми обласьтса юралысьясӧс, зэв ыджыд отсӧг югыд би керӧм вылӧ сетӧмысь. Зэв унатор нин вайис Мӧскуаысь электрооборудованньӧ, эз во на динамо-машина да лампочкаясыс.

Сэсся ёна зэв уджалӧны Айкинаын и коммунистъяс — натӧг ньӧти делӧ оз керсьы, ёна пӧльзуйтчӧны авторитетӧн крестьяна пӧвстын. Сідз жӧ бура рӧбитӧ и ВИК, но кулачество, частнӧй тӧргӧвӧйяс и партияысь шыбитӧм йӧз сы вылӧ зэв лёкӧсь и думайтӧны быдсяма лёк вӧчны — грӧзитчӧны дажӧ кодсюрӧӧс виавны. Сентябр 19-ӧд лунӧ ӧти член Викаӧс нӧйтісны нин; сэсся век найӧ мырсьӧны юралысьяссӧ кыдзкӧ дзугны.

Айкинчи, ещӧ ёнджыка ӧтлаӧ топӧдчӧй, ёнджыка сетӧй отсӧг гӧль йӧзлы, боритчӧй частнӧй капиталкӧд и лёк войтыркӧд, велӧдӧй пемыд войтырӧс бур вылӧ! Сійӧн сӧмын ми вермам став лёксӧ.

Уджалысь.