КОСЛАН ГӦГӦРЫН

(Удораын)

Туйяс омӧльӧсь.

Сикт костъясын туйяс зэв ёна торксьӧмаӧсь. Телегаясӧн ветлыны некутшӧма оз позь. Шор доръяс кырӧмаӧсь, посъяс киссьӧмаӧсь. Ветлыны лоӧ сӧмын пыжӧн. Крестьяна дон мынтытӧг уджалӧмысь ӧткажитчӧны. Колӧ уездсянь видзӧдлыны миян туйяс вылӧ.

Водзвыв велӧдны колӧ.

Ӧнӧдз миян крестьяналы эз висьтавлыны некод вӧр законъяс йылысь. Мукӧддырйи мужикыдлы ковмас ӧти-кык пу. Билеттӧ этша вӧрыд вылӧ абу на велалӧмаӧсь босьтнытӧ. Веськыда кӧ шуны, унджык вӧлі пӧвадаыс лесник-коннӧй-лесничӧйяссянь. Неважӧн локтіс выль лесничӧй да быд билеттӧм кер протоколитіс. Уна йӧз сюрисны суд улӧ. Мукӧд сюрӧм йӧзыс во дасъясӧн ветлісны войнаяс вылӧ. Локтісны гортаныс — керка-карта киссьӧны, колӧ дӧмлавны, сы понда вайӧмаӧсь неуна керйӧн. Йӧз зэв ёна шуасьӧны Сӧвет власьт вылӧ. Ми пӧ тышкасим ассьыным олӧм кокньӧд корсьӧм понда, ӧні век ӧтарӧ сьӧктӧдӧны.

Косланын кутасьӧм бӧрын лесничӧй кайліс Слӧбӧдаӧ кутасьны жӧ, сӧмын сэні йӧзыд сюсьджык миянын дорысь, кужӧмаӧсь мынтысьны кыдзсюрӧ, самӧкур юыштӧм сорӧн. Кодалігас лесничӧйыд воштӧма ассьыс 100 шайт деньга. Ме ногысь, кутасьтӧдзыд колӧ вӧлі чукӧртлыны йӧзӧс да лючки налы висьтавлыны законъяс йылысь да Сӧвет власьтӧн крестьяналы лӧсьӧдӧм кокньӧдъяс йылысь. Крестьяна нинӧм оз тӧдны, чайтӧны вӧлі важ моз.

Ӧти дядь