КРЕСТЬЯНАЛЫ ВӦР СЕТӦМ ЙЫЛЫСЬ

Важӧн, сар дырйи, коми крестьяналы, вӧр пӧвстын олысьяслы, дзескыд вӧлі вӧрысь: билеттӧг нинӧм керыштны‐пӧрӧдны оз позь. Билеттӧ мынтыны деньгаыд абу, лоӧ протоколитӧмысь мездысьны стражаӧс гӧститӧдӧмӧн да сылы уджалӧмӧн.

Сӧвет власьт мырсьӧ кыдз-мый позьӧ крестьяналысь олӧм кокньӧдны. Обисполком корис центрлысь разрешенньӧ крестьяналы вӧр сетны дон босьттӧг.

Неважӧн Обисполком сёрнитіс та йылысь да шуис быд керка вылӧ во кежлӧ дон босьттӧг сетны 3 куба сажень пес, 30 потш, 20 майӧг, куба сажень джын ньӧр, 10 кер (керйыс 9 аршын кузьта 5 вершӧк кызтаӧдз, либӧ 12 аршын кузьта 4½ вершӧк кызтаӧдз). Сійӧ керсӧ крестьяналӧн вузавны оз позь, сӧмын асланыс мог вылӧ видзны.

Вӧрсӧ позяс кыскыны ульӧс кӧть косӧс. 5 уль кер пыдди сетсьӧ 10 кос кер.

Вӧр сетсьӧ со кыдзи:

Волисполкомъяслӧн Комитет Взаимопомощияскӧд колӧ гижны лесничӧйлы, мыйта колӧ крестьяналы уль вӧр да кос вӧр. Гижӧдас колӧ индыны сикт нимъяс, керка лыд, мыйта кутшӧм вӧр колӧ (кер, потш, майӧг, пес, ньӧр), кыскаланін.

Лесничӧй сетӧ вӧлӧсьт вылӧ ӧти билет, индӧ, кытысь позяс кыскавны. Кыті крестьянскӧй вӧр кӧсйӧны лӧсьӧдны (леса местного значения), сэтысь оз позь кыскавны, мед сэні вӧрыс кольӧ мӧдысь кежлӧ крестьянаыслы.

Керъяс ковмас кыскавны водзвыв индӧм катище вылӧ. Пес, потш, майӧг, ньӧр катище вылӧ кыскавны оз ковмы.

Вӧр пӧрӧданінсӧ крестьяналы аслыныс ковмас весавны: йывъяссӧ да увъяссӧ чукӧртны да сотны. Вӧр весавны индалӧ Волисполком, сӧмын юнь 15-ӧд лунӧдз кӧ оз весавны — лесничӧй вермӧ медавны крестьяна тшӧт вылӧ.

Дон босьттӧг сетӧмысь крестьяналӧн ковмас водзӧс мынтыны государстволы. Водзӧсыс лоӧ со кутшӧм: ас сикт гӧгӧрад 15 верстӧдз кӧ лоӧ пӧжар, крестьяналы лоӧ вӧрсӧ кусӧдны дон босьттӧг. 15 верстысь кӧ ылӧ лоӧ ветлыны кусӧдчыны — сэтысь дон сетсьӧ.

Сэсся быд керка вылӧ кык мужик лун (8 часӧн лун) лоӧ уджавны вӧр весалігӧн ас сикт гӧгӧрысь 15 верстӧдз. Кык лунся мужик удж пыдди нывбабалы лоӧ уджавны куим лун, зонпоснилы нёль лун.

Уджавны индалӧ Волисполком Комитет Взаимопомощикӧд. Индігӧн колӧ артавны, кутшӧма олӧ крестьянин, уна-ӧ уджалысьыс. Бурджыка олысьясӧс, унджык уджалысяясӧс колӧ унджык уджӧдны, гӧльясӧс, уджалысьтӧмъясӧс — этшаджык. Вермытӧмъясӧс позьӧ дзикӧдз уджӧдтӧг кольны.

Крестьяналы вӧр кыскавны индӧм местаыс кӧ сотчас, сотчӧм вӧрыс пуктыссяс норма тшӧтӧ, сійӧн крестьяналы ковмас вӧртӧ ёна видзны.

Нормаысь унджык кӧ вӧр ковмас, лоӧ босьтны торъя билет такса серти.

Емваын да Лузаын ю йывъясысь пуръяс вылын турун кылӧдӧны, пурсӧ стража вӧлі секвестируйтӧ, торъя билет кӧ абу босьтӧма. Водзӧ вылӧ сэтчӧс Исполкомъяслӧн позьӧ артмӧдчыны лесничӧйяскӧд, мед сійӧ вӧрыс пырис норма тшӧтӧ, торъя билет босьттӧг.

Ӧні крестьяналӧн колӧ вӧртӧ ёна видзны пӧжаръяссьыд, мед аслыныд жӧ матынджык да бурджык вӧр вӧлі, да мед асланыд пӧра этшаджык мунас кусӧдчӧмас.