ВЫЛЬГОРТЫН

(Сыктывкар улын)

Кооперация.

Асьныс йӧзыс вузасян кооперациясӧ восьтыны некыдзи эз сӧгласитчыны, ӧткымыныс эськӧ гижсьылісны, да этшаӧн, закон серти оз позь вӧлі восьтыны. Сэсся карса ЕПО таво гожӧм восьтіс Выльгортӧ ассьыс отделенньӧ, тӧргуйтӧ торъя заведуйтысь; вузасьӧм мунӧ поводнӧй лӧсьыда. Войдӧр шленӧ эз пырны, ӧні пырӧмаӧсь нин 40 кымын морт. Зэв бур и тайӧ. Гашкӧ, сэсся гӧгӧрвоасны йӧзыс да восьтасны асланыс вузасян кооперация, вӧлӧсьт ыджыд, вермас воны бур пӧльза.

Нюр косьтӧм.

Ӧти ыджыд канава кодйӧма нин 650 сажень. Удж зэв уна, уджалысь мыйлакӧ этша, дон эськӧ поводнӧй вылын нин да: ӧтилаын 2 шайт кубйысь, мӧдлаын кык шайт да 75 ур, пӧденщина зільджык уджалысьлы воӧ кык шайт гӧгӧр, зэв бур дон. Быдӧн кӧ йӧзыс озырӧсь-а; асьныс пыр норасьӧны, уджъяс да нажӧткаяс пӧ абуӧсь.

Няньяс, ӧзимъяс.

Тані ёна пондісны вӧдитны кык гранкиа ид, буракӧ, татшӧм идйыс дырджык оз во, да и кӧдзӧмыс таво сёрмисджык. Воддза кӧдзӧм сю ӧзимъяс шӧркоддьӧмӧсь, бӧръя кӧдзӧм — шочиникӧсь; кос поводдяла эз вермыны ӧддзыны.

Град выв пуктасъяс.

Картупельӧн оз ошйысьны, посни пӧ дай котыртӧм. Сёркни, галан, кушман, лук — шӧркоддьӧмӧсь; морков эз артмы.

Тшак ни вотӧс абу.

Таво тані дзик ньӧти абу некутшӧм тшак ни вотӧс. Сёянторъяс (вӧлӧга) оз лоны.

Самӧкурӧн пӧдтӧны.

Неважӧн на Ляпыд деревняын вӧлі праздник, шуӧны, «пречистаяӧн». Йӧз важ серти часовняӧ волӧмаӧсь зэв нин этша, сӧмын пӧрысьяс; сійӧ эськӧ и бур, тырмас поп-дяклысь зепсӧ тыртны. Абу бур со мый: вывті ёна юӧмаӧсь самӧкур; катыд вожысь пӧ вузавны вайлӧмаӧсь самӧкурсӧ бӧчкаясӧн. Висьталӧны, збыль-абу — ог тӧд-а, ӧти керкаын пӧ кӧзяиныс юкталӧма самӧкурсӧ 75 парта. Эштӧма тай войтӧдныд пищаль пырыд!

П. М.