ВЕТЛІГ-МУНІГӦН

НЁБДІНЫН.

Ветліг-мунігӧн нимкодяси нёбдінса комсомолечьясӧн. Найӧ оз тӧдлыны лун ни вой, век мырсьӧны кыдзкӧ-мыйкӧ лӧсьӧдны том йӧзлы бурджык велӧдчанін. Колян во сэні вӧлӧма «кружок самообразования», нелямын вит (45) морт велӧдчӧмаӧсь. Таво пӧ комсомолечьяс шуӧмаӧсь восьтыны кык кружок, или, кыдзи найӧ асьныс шуӧны, «курсы политграмоты», код пыр думайтӧны лэдзны морт сизимдас кымын. Татшӧм кружокъяссӧ, ме думысь, колӧ лӧсьӧдны и мукӧд вӧлӧсьтса комсомолечьяслы — медвойдӧр Аныбсалы, петкӧдны ассьыныс тӧварышъяссӧ важ туйысь выль туй вылӧ.

Сэсся эськӧ бур лоӧ вӧчӧма и нёбдінса крестьяналы, видзӧдласны кӧ комсомолечьяс да коммунистъяс асланыс мельник выланыс (Есев вылӧ). Сійӧ лун-вой оз дугдыв самӧкур юӧмысь, код юрнас быд ногыс смекайтчӧ изысь дядьӧяс вылад: то изкитӧ сувтӧдас, то дядьӧ сю вылад важ тусь-кыд йӧзтӧ тшӧктас кисьтны, аръяснад, кор изысьыд овлӧ унджык, дзонь вежонӧн уджӧдӧ изӧдчысьястӧ: вартӧдӧ, пес пилитӧдӧ, пес керӧдӧ, уна мукӧд пӧлӧс удж уджӧдӧ.

Тайӧ ӧд эськӧ став нёбдінсаыс жӧ аддзӧны да, некод некор нинӧм оз мӧвпыштны.

РУЧЫН

эм школа, учительяс, комсомолечьяс, мукӧд йӧз, сӧмын абу на, буракӧ, найӧ думыштлӧмаӧсь, кыдзи батьтӧм-мамтӧм челядьяс олӧны Ручас.

Эм Ручын саломщик. Сійӧ видзӧ ӧти батьтӧм-мамтӧм нылӧс, да эськӧ вӧралысь морт лӧсьыдджыка видзӧ ассьыс понсӧ. Ар даса нин нылыс да, школа оз на тӧд. Сэтшӧм батьтӧм-мамтӧм коньӧръяс вылӧ Ручсалы колӧ видзӧдлыны.

«Ю».