ВИЗИН КАРУВСА С.-Х. ВЫСТАВКА

Визин карын 14 и 15 лунӧ сентябр тӧлысьӧ УЗУ вӧлі чукӧртӧма-вӧчӧма видз-му уджалӧм йылысь петкӧдлӧм (районная с.-х. выставка).

Петкӧдлӧм вӧлі вӧчӧма, мед аддзылас миян видз-му уджалысь крестьянин ассьыс овмӧссӧ, мый сылӧн овмӧсас бурыс, мый омӧльыс и кыдзикӧн колӧ сійӧ омӧльторсӧ, омӧль видз-мусӧ пӧртны бурӧ. Йӧзыд, дерт, унджыкыс колӧкӧ оз вӧлі гӧгӧрвоны, мый вӧсна вӧчсьӧ петкӧдлӧмыс. Водзын мунысь крестьянаыс, тӧлкаджык йӧзыс асьныс ваялісны выставка вылӧ овмӧссьыс бурторъяссӧ: выль ногӧн пуктӧм картупельяс, букваяс (галанкаяс), мӧс вердан букваяс, сідз водзӧ. Вӧлі уна чукӧртӧма вӧвъясӧс, мӧсъясӧс, лючки быдтана куканьяс. Бур скӧтлы сетӧны вӧлі премия-деньга. Сетӧма 24 премия 90 чӧлкӧвӧй дон. Кык луннас выставка вылӧ волісны 1,200 морт, на пытшкысь 80 пайыс крестьяна, 20 пайыс велӧдчысьяс да служащӧйяс.

Выставка вылысь вӧлі аддзан, кыдзи колӧ мутӧ уна переменаӧн уджавны, кутшӧм гӧрйӧн гӧрны, кыдзи кӧдзны и сідз водзӧ. Выставка йывсьыд йӧз лӧсьыда сёрнитӧны, сӧмын он пӧ вермы, оз пӧ артмы тадзитӧ, кыдзи висьталӧны.

Частӧджык колӧ вӧчлывлыны татшӧм выставкаястӧ.

Акинь пи.