КОМИ КРАСНОАРМЕЕЧЬЯСЛӦН ОЛӦМ

Уна коми том йӧз служитӧны Гӧрд армияын мусерпас лӧсьӧдалан часьтъясын. (Военно-топографические части). Со мый найӧ гижӧны миянлы: Быд асывсянь рытӧдз ми ветлӧдлам вӧръясын, нюръясын, тӧдмавлам став местасӧ: удж, дерт, эськӧ сьӧкыд да, сӧмын ёртъяс оз артасьны асланыс уджӧн, тӧдӧны — кутшӧм ыджыд пӧльза вайӧ тайӧ уджыд республикалы. Ньӧжйӧник лунысь лунӧ, верстысь верстӧ пасъялам мусер мича бумагаяс вылӧ. Кор став мусерпасыс эштас, ставыс лоӧ син водзын, оз бара ков юасьны йӧзлысь. Быд красноармееч мусерпас серти тӧдас, мед кӧть некор абу волывлӧма, кытӧн нюр, кытӧн шор, кытӧн яг, сідзи водзӧ. Миян видлавтӧг некутшӧм пельӧс оз коль, быдлаӧ тувччылас миян кок. Миянлысь удж оз торк ни зэр, ни лым. Тӧвйыны мунам тӧвся казармаясӧ. Сэні ещӧ ёна кутчысям уджавны, велӧдчыны, газетъяс лыддьыны. Ӧні ӧд военнӧй службаыд абу важ кодь, олам школаясын велӧдчиг моз.

Кр. П. Забоев.