КОМИ КЫВЙӦ ВУДЖӦМ

Коми Обласьтувса Сӧветъяслӧн III-ӧд Съездсянь Обисполком ёна уджаліс коми кыв учрежденньӧясӧ сюйӧм вылын: вӧчавліс комиӧн гижны-лыддьыны велӧдан курсъяс, лӧсьӧдіс комиӧн гижан туйдӧд, мырсис учрежденньӧясӧ пуктавны коми кыв тӧдысь служащӧйясӧс.

IV-ӧд Съезд тшӧктіс тайӧ уджсӧ чорзьӧдны; шуис — ӧні пӧ позьӧ Коми Обласьтын государственнӧй кывъясӧн лыддьыны коми кыв да роч кыв. Сійӧ лоӧ со мый: ӧнісянь Коми Обласьтын быдлаын позьӧ сёрнитны-гижны комиӧн кӧть рочӧн. Водзӧ Обисполком мырсьӧ сэтшӧм вӧлӧсьтъясын, кытӧн олӧны сӧмын комияс, став уджсӧ нуӧдны дзик комиӧн.

Тайӧ вӧчсьӧ, мед роч кыв тӧдтӧм коми уджалысьясӧс сибӧдны Сӧвет уджӧ, вӧчны налы ставсӧ гӧгӧрвоанӧн.

Кыдзи видзӧдӧны коми уджалысьяс та вылӧ:

Крестьяна тшӧктӧм кузя карувса съездъяс вылын сёрни муніс комиӧн, весиг унджык докладсӧ вӧчисны комиӧн.

Прошенньӧяс, жалӧбаяс пондісны гижны ас кыв выланыс асьныс крестьяна (войдӧр вӧлі лоӧ роч кыв тӧдысь гижысьӧс корсьны).

Коми сиктъяссянь гижӧны, коми газеттӧ пӧ крестьяна, весиг нывбабаяс, ёна лыддьӧны, ставсӧ пӧ гӧгӧрвоан да. Коми газет пыр тӧдмасьӧны ставмувывса олӧмӧн, сӧвет власьт удж нуӧдӧмӧн, велӧдчӧны ассьыныс эмбур босьтчӧдны, выль ног видз-му уджавны.

Быд сиктсянь омӧлика гижны кужысь крестьяна пондісны ыставны газетӧ гижӧдъяс асланыс вӧлӧсьтувса олӧм йылысь: буртор йылысь, омӧль йылысь. Сэтшӧм гижӧдъяссӧ газет лэдзанін лӧсьӧдалӧ да печатайтӧ.

Коми кывйӧн удж пондіс ёнджыка босьтчыны коми крестьяна костын, коми нывбабаяс костын тшӧтш.