ОБСУДСА МЕСТКОМЛЫ ЫДЖЫД АТТЬӦ

(Сёйтыса гражданасянь)

Таво тулыссянь Обсудбердса месткомлы (Обсудын, Прокуратураын да Исправдомын служитысьяслы) вӧлі сетӧма уджалан (подшефнӧй) сиктъяс Сёйты да Додз (Кулӧмдін карулысь). Сыктывкарсянь найӧ кыкнанныс ылынӧсь да ва сайынӧсь (Сёйтыыс кык ва сайын). Сы понда йӧз костын уджъяс нуӧдны ёнасӧ эз вермыны. Пӧшти став удж пыддиыс вӧлі вӧчӧма йӧзлы сӧмын ӧтик буртор — Сёйтыын восьтісны ясли. Сёйтыса гражданалӧн челядьыс олісны яслиын страда чӧж. Мукӧд луннас чукӧрмӧ вӧлі 17 мортӧдз, ставыс посньыдикӧсь — 1 вежонсянь куим арӧс да джынйӧдз.

Лӧсьӧдісны яслилы керка пытшкӧс да вӧчисны наръяс сэтчӧс граждана асьныс. Сыысь кындзи найӧ вӧлі вайӧны йӧв. Сэсся яслилы отсӧг вӧчис Обженотдел: сетіс сійӧ партукъяс да челядьлы улыс паськӧм вылӧ 60 аршын полотно. Став мукӧд рӧскодсӧ (нянь-сов да мукӧд пӧлӧс сёян-юан, заведуйтысьлы да 4 кага видзысьлы жалӧванньӧ да, вӧлӧга да, мукӧд пӧлӧсӧс) Обсудын, Прокуратураын да Исправдомын служитысьяс лэптісны ас вылас.

Яслиын ёна уджаліс, тӧждысис челядь вӧсна яслинас заведуйтысьыс — К. А. Лысова. Сёйтыса граждана колины зэв дӧвӧльнӧйӧсь, ӧні ыстӧмаӧсь Обсудӧ исполкомын эскӧдӧм татшӧм гижӧд:

«Ми, Сёйтыса граждана, ыстам Обсудбердса месткомлы ыджыд бурсиӧм (благодаренньӧ). Страда дырйи челядь миян олісны яслиын лӧсьыда. Видзисны, вердісны-юкталісны найӧс да бергалісны на гӧгӧр зэв бура, видзысьяс тӧждысисны ёна. Яслиын служитысьясӧн ми зэв дӧвӧленӧсь. Миян пемыд сиктлы отсалӧмысь, бур вӧчӧмысь тіянлы ыджыд аттьӧ! Водзӧ кежлӧ отсӧгъяснад энӧ вунӧдӧй, сідз жӧ и ми огӧ вунӧдӧ тіянлысь бур». (Кырымъяс).

Й. К.