ВЫЛЬ БЫТ

Кузнеч Петыр ветлӧма клубӧ. Гортас локтіс зэв нимкодь.

— Тырмас, Паладь, сэсся важ ногӧн овны! — шуӧ гӧтырыслы. — Кутшӧм нӧ ме лоа пролетарий, эг кӧ ӧнӧдз вермы гортын лӧсьӧдны выль олӧм, кыдз шуис талун висьталысьыс — выль быт?.. Нолтӧ, Паладь, шыблав ӧбразъястӧ ӧдйӧнджык! Нинӧм наысь!..

— Мый нӧ тэ, йӧймин али мый? Кыдзи нӧ святӧй ӧбразъяс шыблавны позьӧ? Поп-батюшкоыд нӧ мый шуас?.. Бур йӧзыс мый шуасны?.. Мый вылӧ нӧ сэсся ме юрбитны кута?..

— Тэ ньӧти эн юрбит!.. Сэтысь нинӧм. Енлы веруйтӧм сӧмын пемдӧдӧ йӧзлысь вежӧрсӧ.

Дыр висьтавліс Петыр бабаыслы ен вера йылысь: кытысь сійӧ лоӧма, мыйла сійӧ лоӧма, мыйла сійӧ оз ков.

— Кӧть дзонь вежон висьтав — веськодь меным, ог кывзы ни... Тэ, колӧкӧ, юрбит Калининыд вылӧ, ме пыр кута юрбитны Микола-угодниклы, Степан Пермскӧйлы да Изӧсим-Саватейлы...

— Со и тӧлкуйт тэкӧд!.. Гӧгӧрвоан али он тэ, Паладь: ӧні колӧ лӧсьӧдны выль быт...

— Мун сэтысь бытнад и ставнад! Некутшӧм быт меным оз ков... Шыбит лёк думъястӧ да пуксьы — сёй... Лунтыр ноксян, пуан-пӧжалан, сідзи и косьмас да шузяс сэсся ставыс... Кутшӧмкӧ быт аддзӧма...

— Но, мокасьтӧ, дзикӧдз вуні!.. Тэ, Паладь, дугды пыр пач дорад ноксьӧмсьыд. Колӧ лӧсьӧдны ӧтувъя сёянін — столӧвӧй... Выль ногӧн ӧні колӧ овмӧдчыны гӧгӧр. Пач дорад, гырничьяс-кашникъяснад ноксьӧмыд сійӧ войдӧр вӧвлі — важ права дырйи. Тадзи висьтавлісны талун миянлы клубын.

— Мыйкӧ ещӧ он-ӧ шу... Больгӧ-больгӧ нинӧм абусӧ!.. Мый нӧ Матрен тьӧтӧ шуас? Мый нӧ Катьӧ кума шуас?.. Оз ло тэ ногӧн!..

Лэптысис бура ыджыд зык. Садьмис каганыс. Паладь кинас шлачкӧдыштіс кагаӧс:

— Узь, узь тэ, мый равзан...

— Тэ, Паладь, нӧйтны челядьӧс эн лысьт! Сійӧ важ права дырйи ещӧ на вӧлі позьӧ, а ӧні — шабаш, эн вӧрӧд!

— Мы-ый? Ассьым кагаӧс ог лысьт вӧрзьӧдны? Ме ӧмӧй сылӧн абу мам?.. Тэныд татчӧдз абу мог!.. Пӧльяс-пӧчьяс нӧйтлывлісны дай миянлы тшӧктісны...

Кузнеч Петыр зэв ыджыда ышловзис да ланьтіс. Недыр мысти бара шуӧ:

— Вӧскресенньӧӧ ветлам клубӧ, спектак сэні лоӧ, кутасны выльногса олӧм йылысь ворсны.

— Миянлы некор шляйтчыны клубъясӧд, эм на спектаксьыд коланторджык: Ӧнтип сват корис пыртчыны, тэныд лоӧ вежаявны...

— Вичкоӧ ме ог пыр, сійӧ важ быт; ӧні выль ногӧн пыртчӧны — Октябрина вӧчӧны. Мый нӧ важ моз пыртчӧмсьыд? Сӧмын самӧкур жӧританныд...

— Тэныд нӧ эськӧ мый колӧ? Гашкӧ коньяк да?.. Ӧд кутшӧм барин-господин!.. Юан на и самӧкурсӧ... А вежаявны лоӧ мунны. Он кӧ мун, ме став гырничьяс, кринчаяс, ставсӧ дрӧбита...

Петыр нинӧм эз шу. Мый татшӧм бабанад вӧчан?.. Войнас дыр ӧтар боквывсянь мӧдарас бергаліс, ыджыда лолаліс, мыйкӧ мӧвпаліс...

_____

Мӧд лунас кузнеч Петыр локтіс код. Киас — выль ӧбраз.

— Паладь! — равӧстіс ыджыд гӧлӧсӧн. — На, босьт!. Кык шайт сеті та вылӧ. Сэсся карӧ ысті письмӧ — ен рисуйтысьлы, тшӧкті гижны ӧбраз, преподобнӧй Распутинӧс!.. Ыджыдӧс-ыджыдӧс, со кутшӧмӧс!.. Кызь вит шайт!.. Ммгг...

Паладь быдӧн шай-паймуніс.

— Кӧн нин жӧритін, стӧкаритан голя?

— Пыртчанінын вӧлі... Ок, ён и самӧкур юим, веськыд спирт важ правадырся!.. Выль быт кӧ менам эз ло — важнас кутам овны... Кылан?

— Ланьт, горлань!.. Кагасӧ садьмӧдан...

— Гмм... Кага?.. Кӧні сійӧ?.. Часлытӧ ме сійӧс шлячкӧдышта, мед бӧрдны эз лысьт... Эн мешайт меным... Пӧльяс‐пӧчьяс нӧйтлывлісны дай миянлы тшӧктісны... Нолтӧ, ланьтан он, ланьтан он?!. На тэныд, на, эн равзы!..

Паладь ӧдва мырддис Петыр ордысь кагасӧ.

— Вод нин, вод, Петыр! Сёр нин ӧд...

— Ме вода? Дугдан на... Вай меным сёйны...

— Кутшӧм сёйӧм воя-войын? Ставсӧ нин кыскалӧма, петкӧдлӧма...

— Вай, шуӧны тэныд! — горӧдіс Петыр. — Пу вай чериа шыд!.. Ӧти здукӧн!.. Дырджык сэні!.. Сэсся котӧртлы дякӧн ордӧ, кор самӧкур юны, сійӧ оз бӧрыньт... Менам кӧ гортын коли важ быт, важ ногӧн и кута овны... Со кыдз ми!..

Вой шӧр гӧгӧрӧдз Петыр карапужитчис. Пызансӧ пӧрӧдіс, муртса бабасӧ эз нӧйт. Сэсся уси лабичсяньыс да сэтчӧ и онмовсис...

_____

Петыр садьмис лабич улын, чеччис, видзӧдліс гӧгӧр — шензьӧ: ен джаджйын весиг ӧтик ӧбраз абу.

— Ме, Петыр, став ӧбразтӧ пачын талун соті. Пӧдлинӧ тай важ бытнад лёк олӧмыд. Кутам сэсся овны выль бытӧн.

Чавк.