КУТШӦМА УДЖАЛӦНЫ МӦДА-МӦДЛЫ ОТСАСЯН КОМИТЕТЪЯС

Колян коми газет номерын вӧлі гижӧма Визябӧжса мӧда-мӧдлы отсасян комитет йылысь. Неуна тӧдмалім сылысь удж нуӧдӧмсӧ. Ӧні видзӧдлам, кутшӧма уджалӧны татшӧм комитетъясыс мукӧд вӧлӧсьтъясын.

Босьтам Кӧрткерӧсса комитет.

Комитет абу на вермӧма паськӧдны уджсӧ. Водзмӧстчысьджык йӧз абу. Крестьяна оз на тӧдны, кутшӧм бур, кокньӧд вермас вӧчны колігъясӧн тайӧ комитетыд. Водзмӧстчысь йӧзлы колӧ чорыда кутчысьны тайӧ уджӧ.

Комитетӧ ӧні чукӧртӧма 155 шайт 45 ур деньга да 21 пуд 23 тув сю.

Колян во гӧгӧр сетӧма уджӧн вермытӧм йӧзлы 55 шайт деньга да 28 пуд нянь. Таысь ӧтдор сетӧма 25 пуд нянь бӧр мынтытӧм вылӧ.

Ми чайтам, Кӧрткерӧсса комитет водзӧ сьӧлӧмсьысджык кутчысяс уджавны.

Важкуа вӧлӧсьтын крестьяна чукӧртчылӧмаӧсь скод вылӧ да шуӧмаӧсь босьтны быд сёйысь юрысь 3 тув няньӧн, позьӧ вештысьны деньгаӧн да мукӧдторйӧн. Крестьяна тӧдӧмаӧсь нин, кутшӧм ыджыд пӧльза вермас вӧчны комитетыд водзвыв тӧдтӧм приччаяс суигъясӧн.

Ӧнӧдз комитет уджалӧма зэв омӧля, водзӧ кӧсйӧны ёнджыка босьтчывлыны.

Нёбдін вӧлӧсьтын некутшӧм удж комитет абу вӧчӧма ӧнӧдз на. Комитет ордын сӧмын 15 шайт деньга да 2 пуд нянь. Во гӧгӧрын сетлӧмаӧсь уджӧн сӧмын 2 пуд нянь. Воӧм гижӧдъяс пукталӧмаӧсь папка пытшкӧ, сэні зэв лӧсьыда куйлӧны... Уездсянь эськӧ дерт кӧнкӧ виччысьӧны воча юӧръяс да — кысь бара, комитет узьӧ зэв чӧскыда, оз эштыны воча гижны...

Крестьяна, пальӧдӧй комитетнытӧ да пальӧдчӧй асьныд! Коркӧ кӧ ковмас отсӧг да оз кӧ ло сійӧ отсӧгыс — дивитӧй асьнытӧ.

Минин.