«ШОНДІБАНӦЙ, ТОМ ПӦРАӦЙ»...
Ньӧртӧг пӧ челядьӧс быдтыны он вермы, шулӧмаӧсь важ йӧз. Найӧс асьнысӧ бать-мамныс быдтывлӧмаӧсь ньӧрйӧн, сы понда уна на миян крестьяна пӧвстын ньӧрйӧн челядьлы юр вежӧр сюйысьяс. Посни челядьлӧн ӧд мый гажыс: ворсӧм, сьылӧм, йӧктӧм, котралӧм да унатор, ставсӧ висьтавны он вермы. Ворсӧмсорӧн челядь велалӧны сюсьмыны, юрвежӧрасьӧны. Кодлӧн челядьлы сетӧма вӧля мичаа ворсны, челядь оз повны зэрысь ни ваысь. Висьӧмъяслы сетчӧны зэв шоча. Быдмӧны, сӧвъявмӧны лунысь лунӧ, воысь воӧ.
Видзӧдлӧй, мый вӧчӧны челядь ворсан керкаясын (детскӧй садъясын)! Ставныс жуӧны, мыйкӧ вӧчӧны. Прӧст пӧра некодлӧн абу. Некутшӧм тыш ни кось.
Ӧні босьтам пионеръясӧс. Любӧ на вылӧ видзӧдлынытӧ. Колян вӧскресенньӧӧ кар кузя ветлісны, ыдждӧдлісны ассьыныс праздникнысӧ. Паськӧм ставныслӧн ӧткодь, гӧрд галстукаӧсь, уличаяс кузя мунӧны радӧн-радӧн. Тувччалӧны ӧтпырйӧ, ӧтмоз, быттьӧ военнӧй йӧз. Радын сулалігӧн некод оз бӧрыньтчы, водзмӧстчы, сулалӧны ӧти визь кузя. Кывзӧны сӧмын ассьыныс командиръяссӧ.
Синва петмӧн на вылӧ завидь! Колӧма тай эськӧ чужны во кызь витӧн кымын сёрӧнджык да, мый вӧчан, он гашкӧ арлыдтӧ чинты...
Октябрса революция мездіс уджалысь йӧзӧс озыр кипод улысь, сетіс нывбабалы мужикъяскӧд ӧткодь права; сӧмын уна челядь на абу мездмӧма лёк мам-бать кипод улысь, ичиньяс кипод улысь. Ворсан керкаясад да пионеръясад пырӧмаӧсь сӧмын бур мам-батьлӧн челядьыс. Налы быдлаын долыд. Уна челядьӧс, ворсӧм пыдди да велӧдчӧм пыдди, миян крестьяна мырдӧн юрбитӧдӧны, вичкоӧ котрӧдлӧны, потан дорын пукӧдӧны. Ворсӧмысь — чужйӧны, сьылӧмысь — катшкӧны, — коньӧръяс, оз и аддзывлыны чужӧмсяньныс долыдлунсӧ.
Ӧти дас арӧса детиналысь ме юалі, мыйла нӧ, мися, он гижсьы пионерас? Синва сорӧн коньӧр шуӧ: мамӧ да батьӧ пӧ оз лэдзны. Мам-батьыс сылӧн, бокисянь видзӧдны, зэв ен дор кутчысьӧны — думайтан, зэв жӧ нин челядьлы накӧд овны, быдмыны долыд. Матісяньджык кӧ видзӧдлан — сӧвсем мӧд. Челядь ӧти кыв оз тӧдны рочӧн — велӧдӧны отченашъясӧ. Унаысь дзик прӧстӧ нӧйтлӧны, видчӧны лёк кывъясӧн.
Татшӧм челядьыс Коми му пасьта уна на эм. Колӧ найӧс кыдзкӧ мездыны лёк мам-батьясысь, ичиньясысь. Колӧ восьтавны быд сиктын пионер ячейкаяс, мед найӧ асьныс, том йӧз (комсомол) отсалӧм сорӧн, мездасны став челядьсӧ. Сӧмын сэки воссяс налы долыдлун.
Коми йӧзлӧн эм важ сьыланкыв: «Шондібанӧй олӧмӧй, том пӧра коллялӧмӧй». Тайӧ кывъяссӧ том йӧзлы оз ков вунӧдны. Олӧмджык йӧзлы колӧ думыштлыны, кутшӧм сьӧкыд уналы вӧлі быдмыны, сы понда колӧ кыдз-мый вермасны кокньӧдны челядьлысь быдмӧм. Зарни том пӧра нэм чӧжын овлӧ сӧмын ӧтчыд, тайӧс некод энӧ вунӧдӧй!
Дугдӧй ньӧрйӧн да отченашъясӧ велӧдӧмӧн юр вежӧр сюйны челядьлы.
Ичинь пи.
