ЛӦСЬӦДЧӦЙ ПРАЗДНИК КЕЖЛӦ!

Таво арын став Сӧветса Республика пасьта лоӧ вӧчӧма праздник — «нянь воӧм праздник» («праздник урожая»).

Тайӧ праздниксӧ кутас нуӧдны Комсомол.

Кыдзи колӧ коллявны тайӧ праздниксӧ?

Колӧ школаясын, клубъясын, лыддьысян керкаясын вӧчны докладъяс, лекцияяс; висьтавлыны, кыдзи бура видз-му уджавны, наука серти, мед эз вӧвлы миян нянь вотӧм во. Кӧнъясын эмӧсь выль ногӧн уджалӧм видз-муяс (опытно-показательные участки), сэтчӧ колӧ нулыны крестьянаӧс, том йӧзӧс, петкӧдлыны налы, кыдзи колӧ уджавны.

Каръяслы тайӧ праздник кежлӧ колӧ ыстыны деревняясӧ бурджык йӧзӧс, став агрономъяссӧ — оз ков вунӧдны: праздникыс вӧчсьӧ деревнялы, крестьяналы.

Праздникнас миянлы колӧ петкӧдлыны крестьяналы, кыдзи бурджык, кокниджык видз-му вӧдитны, кутшӧм ногӧн воас унджык пӧльза.

Ми унджыкысь вӧчавлам праздникъястӧ водзвыв лӧсьӧдчытӧг; сы вӧсна прамӧя некор оз артмыв.

Тайӧ «нянь воӧм праздниксӧ» колӧ нуӧдны бура водзвыв лӧсьӧдчӧмӧн; медъёна колӧ та йылысь тӧждысьны комсомоллы.

Мед тайӧ праздникыс мунас со кутшӧм сиӧм серти:

— Каръяскӧд ӧтувтчӧмӧн деревня мӧдас мунны Ленин индӧм туй кузя.