ГРИВА ВӦЛӦСЬТЫН

Крестьяна олӧны видз-му уджалӧм вылын. Мукӧд пӧлӧс нажӧтка гожӧмын абу. Гожӧмбыд мырсясны видз-му гӧгӧр — няньыс некор оз судзсьывлы. Эз кӧ вӧв тӧвся нажӧткаяс, крестьяналы вӧлі эськӧ зэв дзескыд, сӧмын кер лэдзӧм сорӧн вермӧны вуджны выль няньӧдз. Колян тӧв «Северолеслы» лэдзисны тырыс кер, сӧмын зэв донтӧг, да ещӧ уджалӧм донсӧ вӧлі оз пырысь-пыр мынтыны, дыр вӧлі нюжйӧдласны. Дерт эськӧ, тайӧ нажӧткаыд абу жӧ нажӧтка да, мый нӧ вӧчан, быть кыдзкӧ кыссьы выль няньӧдзыд. Таво колӧ обласьтса учрежденньӧяслы отсавны крестьяналы, мед Северолес колян тӧвся моз оз ӧбӧдит мужиктӧ.

Кӧдзаяс таво абу быдлаын ӧткодьӧсь. Кузя зэрӧм понда, васӧд муяс вылын, нянь омӧль, косджык муяс вылын шӧркоддьӧм.

Турун абу жӧ мукӧдлаын кодь бур. Посни юясын видзьяс ва улысь омӧля петавлісны. Зэрысь ӧтдор крестьянаӧс ёна ӧбӧдитіс Кажым завод прудйысь лэдзӧм ва. Уналӧн нин вӧлі ытшкӧма, куртнысӧ эз ковмы, ставсӧ нуис, а ытшкытӧм видзьяссӧ — тыртіс лӧптӧн (кламӧн), лыаӧн.

Вӧлӧсьтса учрежденньӧясын.

Волисполком уджалӧ шӧркоддьӧма, сӧмын председательыс да сійӧс вежысьыс унаысь кодавлӧны.

Налы кодавны зэв нин абу лӧсьыд.

Мӧда-мӧдлы отсасян комиссия эськӧ уджалӧ да, сӧмын зэв этша сылӧн выныс. Мый вӧлі няньыс — ставсӧ сеталӧма водзӧсӧн выль нянь вотӧдз.

Общественнӧй лавка уджалӧ бура. Шленыс 167 морт. Крестьяналы колан тӧваръяс вайлӧны. Тӧвар дон мукӧдлаын дорысь абу вылын. Дерт эськӧ, колӧ унджык тӧвар да, мый нӧ вӧчан, Визинса контораас абу да.

Крестьяналӧн юр вежӧр.

Поп-дякӧс кывзысь лунысь-лун чинӧ. Вичкоӧ ветлӧны сӧмын пӧрысьджык йӧз да ен дорӧ (бокисянь видзӧдны!) кутчысьысь йӧз. Ӧні унаӧн нин гӧтрасьӧны поп венечтӧг.

Крестьяналӧн юр вежӧр водзысь водзӧ воссьӧ. Судзӧдӧны том йӧзкӧд ӧтвылысь «Крестьянскӧй газетъяс». Газет судзӧдысь ньӧжйӧник содӧ водзӧ. Газетъяс весь оз вошны. Унаӧн нин мӧвпалӧны выль ног видз-му уджалӧм йылысь, машинаяс судзӧдӧм йылысь, сӧмын оз на тӧдны, кыдз-мый колӧ кутчысьны тайӧ уджъясас. Завраг сиктса крестьяна кӧсйӧны лӧсьӧдны машиннӧй тӧварищество.

Г. Ч.