ЧУЖӦ ЕН ТӦДТӦМ КӦЙДЫС

Чужӧ ен тӧдтӧм кӧйдыс... Пыртчытӧм. Позьӧ ӧмӧй нӧ войдӧр вӧлі попӧн ва пиын тупльӧдлытӧг видзны? Сійӧ ӧд эськӧ эз ло морт, скӧтсьыс скӧт... Гӧтрасьӧм. Войдӧр ӧмӧй нӧ лысьтліс морт гӧтрасьны корасьтӧг, кикуттӧг, чунькытшасьтӧг, сёйтӧг-ютӧг, бать-мам тшӧктытӧг, бать-мам бурситӧг, поп-дяк горзытӧг, венечтӧг? Дерт, эз. Муыс ӧд сэтшӧм морттӧ эськӧ эз лэпты!..

Ён, чорыд, тыдавтӧм тыш мунӧ тома-пӧрыся костын, поп-дяккӧд, енкӧд. Вочасӧн, зэлыда-зэлыда чуктӧ ен йӧз вежӧрысь. Разалӧ син водзысь нэмӧвӧйя кыз пемыд ру.

Босьтам Кӧдзвылысь ӧти зонмӧс. Велӧдчытӧм (муртса лыддьыны кужӧ) му уджалысь морт. Сы сайӧ ӧти нывлӧн бать-мамыс оз сетны вӧлі нывсӧ венечтӧг.

«Сетӧй кӧть энӧ. Меным веськодь, меным мӧд сюрӧ. Мыйла нӧ ме вичкоас муна? Мыр моз сулавны. Видзӧдны поплысь пӧсь петтӧдз зільӧмсӧ. Ме Краснӧй армияӧ ветлӧмсянь нин енсӧ ог тӧд, ме казялі — некутшӧм ен абу», — шуӧ зонмыд.

Быд ног зілисны том мортӧс ылӧдны, эз вермыны. Повзисны невесталӧн бать-мам жӧник воштӧмысь, сетісны венечтӧг. Ен тӧдтӧмлун вермис. Эз нин этша вӧв татшӧм тыш, эз нин этша венлы ен тӧдтӧм морт.

Катласьӧ важ пемыд олӧм, ньӧжйӧник пӧлыньтчӧ выль югыд олӧмлань.

Эз вош ен тӧдтӧм кӧйдыс, сійӧ чужӧ, вужъясьӧ, быдмӧ, паськӧдӧ коръяссӧ. Ен тӧдтӧм кӧйдыс кӧдзсьӧ быд лун коми сиктӧ коммунистъясӧн, комсомолечьясӧн. Коми том йӧз, куталӧй сійӧ кӧйдыссӧ. Ставныдлы мед лоӧ. Регыдджык сэки велаланныд овны, ӧдйӧнджык воанныд гажа кокньыд олӧмлань, тэрыбджыка кыптас Югыд Шонді — Социализм.