КУТШӦМА ОЛӦНЫ ИЗЬВА УЕЗДЫН?

Ме важӧн нин лыддя «Югыд туй» газет. Гижӧны сэні быдтор йылысь. Тӧда, кутшӧма крестьяна олӧны Сыктыв ю кузя, Эжва кузя, Емва кузя, Вашка-Мезень кузя. Кутшӧм олӧм Изьва кузя — ог тӧд.

Изьва погостын эськӧ петӧ газет «Красная Печора» да, татчӧ оз ыстывлыны, мед эськӧ кӧть номер-мӧд-коймӧд ыстісны гырысьджык обласьтса учрежденньӧяслы да Югыд туй редакторъяслы. Сэки мыйсюрӧ позис эськӧ печатайтны миян Сыктывкарса газетын. Ми, коми йӧз, торйӧдчим асланым автономияӧ ӧтвылысь уджалӧм вылӧ, мед эськӧ быд вӧр пельӧсъясын дас во революция тырӧм кежлӧ эз коль весиг ӧти нинӧм тӧдтӧм морт. Медвойдӧр миянлы колӧ тӧдмавны газет пыр став крестьянаыслысь олӧмсӧ. Сэки эськӧ пондім тӧдны, кытӧн, кутшӧм удж колӧ нуӧдны. Сӧмын Изьваса коми йӧз некор оз гижлыны, кутшӧма найӧ олӧны, быттьӧ мӧдаръюгыдынӧсь. Кыв-кыв серти шочиника кывлан, Изьваын пӧ олӧм миян дорысь ас нога, кутшӧм сійӧ асногса овмӧсыс, ме ог тӧд.

Изьваса ёртъяс! Босьтчылӧ гижны асланыд олӧм-вылӧм йылысь быд сиктсянь, вӧлӧсьтсянь. Петкӧдлӧ эжваса коми йӧзлы газет пыр ассьыныд олӧмнытӧ. Эжваса йӧзлы ті йылысь колӧ жӧ тӧдны.

Асьныд тӧдмалӧ миянлысь овмӧс. Судзӧдӧ унджык газет, мед быд пельӧсӧ воас. Сэки мӧда-мӧдӧс ёнджыка тӧдмалам да кутчысьлам ӧтув уджавны газетын Эжва коми, Изьва коми да пермяк коми торйӧдтӧг.

П.