КОМИ КРЕСТЬЯНА, СӦВЕТ ВЛАСЬТ ТІЯН ВӦСНА ТӦЖДЫСЬӦ — ТЭРМАСЬӦЙ ӦТУВТЧӦМӦН БОСЬТНЫ СЫЛЫСЬ ОТСӦГСӦ

Ставрочмувывса овмӧс кыпӧдӧм вылӧ сьӧм удждысь — Сельскокӧзяйственнӧй Банк — сетӧма Коми овмӧс кыпӧдӧм вылӧ удждысь обществолы сьӧм. Сійӧ сьӧмысь — 4220 ш. 15 ур — шуӧмаӧсь уджйӧзӧн лэдзны кустарнӧй удж кыпӧдӧм вылӧ, 2956 шайт 60 ур — бур скӧт босьтӧм вылӧ, 3944 шайт 98 ур — турун кӧдзӧм вылӧ, 1478 шайт 35 ур — керка-карта пуктӧм вылӧ, 3944 шайт 9 ур — вый вӧчан заводъяс лӧсьӧдӧм вылӧ, и 1417 шайт 10 ур — машинаяс ньӧбӧм вылӧ.

Мед ми, коми йӧз, вермам бура лӧсьӧдны ассьыным олӧм-вылӧмнымӧс, мед вермам шыбитны важ оланног да овмӧдчыны выль ногӧн, колӧ мед тайӧ сьӧмыс ӧтик урӧдз воас сэтчӧ, кытчӧ шуӧма.

Сідзи велӧдӧ вӧчны Ставрочмувывса С.-Кӧзяйственнӧй Банк.

Тайӧ сетӧм сьӧмӧн Коми Сель.-Кӧз. Банк заводитчӧ уджавны. Водзӧ уджыс сылӧн паськалас, сьӧмтӧ ещӧ содтасны.

Сир пуысь, дьӧгӧдь вӧчысь, кыйсьысь-вийсьысь, валеги гындысь, бур му-видз уджалысь коми морт, тӧд дай эн вунӧд: тэ вӧсна Сӧвет власьт тӧждысьӧ, кӧсйӧ отсавны тэныд. Тэрмась сылысь отсӧгсӧ босьтны да лэптыны сійӧ сьӧм вылас ассьыд олӧм-вылӧмтӧ.

Коми Сельбанк удждӧ сьӧм сӧмын ӧтувтчӧм йӧзлы — кредитнӧй сельскокӧзяйственнӧй тӧвариществояслы. Сэтшӧм ӧтувтчӧм крестьянаыс кӧ ассьыныс чукӧрнысӧ кытчӧкӧ гижсьӧдӧмаӧсь — регистрируйтӧмаӧсь (Обласьтувса Финотделын ли Земотделын, позьӧ кооперативъяс Союзын) да эм кӧ налӧн устав, найӧ и вермасны сьӧмтӧ Банкысь удждыны.

Коми му-видз уджалысьлы колӧ тэрмасьны ӧтлаӧдчыны да ӧтвыв корны сьӧмтӧ Банкысь.

Удждыныд кӧ крестьянаыдлы пондісны, мӧдас миян выль нога удж.

Эновтӧм сир-дьӧгӧдь пуан пачьяс бара мӧдасны ломтысьны. Бара мӧдасны сетны доход коми мортлы, коми уджалысь йӧзлы, а найӧ — лэптасны став коми олӧм-вылӧмсӧ.

Гӧль йӧз, тэрмасьӧ ӧтлаӧдчыны, гижӧдӧй ассьыныд уставнытӧ. Босьтчамӧй ӧтувтчӧмӧн лӧсьӧдны сир-дьӧгӧдь пачьяснытӧ, лӧсьӧдӧй сир песнытӧ. Тэрмасьӧй босьтны крестьянскӧй пайяс, корӧй уджйӧзӧн сьӧм.

Кодъяс нин войдӧр ӧтувтчӧмаӧсь, восьтӧмаӧсь тӧвариществояс, найӧ гӧгӧрвоӧны нин пӧльзасӧ ӧтувтчӧмсьыс, пӧльзасӧ турун кӧдзӧмысь, бур скӧт видзӧмысь, гырысь рӧд порсь рӧдмӧдӧмысь, мукӧд выльторйысь.

Сэтшӧм крестьянаыслы колӧ быд чукӧртчылігӧн висьтавлыны та йылысь мукӧд крестьянаыслы, мед ставныс гӧгӧрвоасны. Ӧтувтчӧмӧн ньӧбалӧй крестьянскӧй пайяс, сетӧ ёрта-ёрт вылад кругӧвӧй пӧрука, мый тіян сьӧм мунас делӧ вылӧ, мый ті мынтанныд уджйӧзнытӧ срокӧ. Тэрмасьӧй, корӧй уджйӧзӧн сьӧм!

Коммунистъяс, профсоюзса членъяс, отсалӧй коми мортлы ӧтувтчыны, велӧдӧ, кыдзи шедӧдны уджӧн сьӧм Коми Сельбанкысь. Асьныд кӧ онӧ ёна тӧдӧ та йылысь, велӧдчӧй агрономъяслысь, инспекторъяслысь, кодъяс ӧні муналісны вӧлӧсьтъясӧ.

Климушев Яков.