АНГЛИЯСА ПРОФСОЮЗЪЯСЛӦН СЪЕЗД

Гулл (кар Англияын) сентябр 1 лунӧ воссьӧма съезд англияса профсоюзъяслӧн. Съезд восьтігӧн Пёрселл висьталӧма, кутшӧм ыджыд удж нуӧдӧны рабочӧйяс пӧвстысь бӧрйӧм йӧз тайӧ сьӧкыд воясӧ асланыс бӧрйысьяслысь оланног кокньӧдӧм понда. Гырысь войнаяс дырйи ёна жмитлісны уджалысьястӧ быдлаын, и эз кӧ найӧ ӧтувтчыны союзъясӧ, ещӧ на сьӧкыд эськӧ вӧлі. Уджалысь йӧз ёна на гӧльӧсь. На пыдди озырмӧны фабрикантъяс, буржуйяс. Водзӧ союзъяслы ёна на ковмас озыр йӧзкӧд вермасьны, мед озыр йӧз пӧльза этшаджык босьтасны да лэптасны жалӧванньӧ уджалысьяслы.

Германияа-союзникъяс кост лӧсьӧдчӧм йылысь Пёрселл шуӧ, татшӧм лӧсьӧдчӧмнад пӧ бара на ёна доддялісны германияса уджалысь йӧзӧс.

Россияса рабочӧй‐крестьяна йылысь казьтыштігӧн Пёрселл шуӧма, ми пӧ быд ног мырсим на дор. Ӧні пӧ радлам Россия-Англия костын лӧсьӧдчӧм вылӧ. Ми пӧ важӧн нин сулалам Социал Сӧвет Республика Союз дор. Ӧнія лӧсьӧдчӧм бӧрын россияса да англияса рабочӧйяс костын кутас лӧсьыдджыка мунны удж. Ми пӧ ёна ошкам миянкӧд ӧтвыв россияса уджалысьясӧс.

Дас во ыджыд война пансьӧм тырӧм понда Пёрселл шуӧма, водзӧ некутшӧм война государствояс костын оз лоны, рабочӧйяс кӧ крестьянакӧд ӧтвылысь кутасны ӧтдортчыны война панӧмъясысь. Мед озыр йӧз ӧнісянь тӧдасны — уджалысь йӧз на вӧсна вир кисьтны ӧнісянь дугдасны.