ЧЕЛЯДЬ ВЕЖОН
Тӧрытъя лунсянь заводитчис став му вылас «челядь вежон». Тайӧ вежон бӧрас сентябр 7-ӧд лунӧ лоӧ ставмувывса том йӧзыслӧн лун. Сійӧ лунсӧ пондасны празднуйтны комсомолыскӧд тшӧтш посньыдджык челядь. Найӧ ӧд лӧсьӧдчӧны нин ӧнісянь уджавны водзӧ вылӧ комсомолыскӧд тшӧтш, велӧдчӧны налысь.
Став му вылас нин ӧні кыпӧдчӧны гырысьяс бӧрся уджалысь йӧзлӧн челядь. Ичӧтысянь велӧдчӧны аслыныс туй писькӧдны, олӧм лӧсьӧдны чукӧрӧн-котырӧн, ӧтвылысь. Став му пасьталаыс нин эмӧсь челядьлӧн отрядъяс. Паськалӧны, ёнмӧны сійӧ отрядъясыс. Абу ӧд прӧста найӧс шуӧмаӧсь том «пионеръясӧн». Пионерыс — туй писькӧдысь. Ичӧтысяньыс велӧдчӧны ӧні челядь уджавны, вермасьны быдсяма омӧльыскӧд му вылас. Вежӧрмӧдӧны, югдӧдӧны ассьыныс юрнысӧ. Лӧсьӧдчӧны вежны выль олӧм вӧчан удж вылысь, озыръяскӧд вермасян удж вылысь мудзӧм гырысь йӧзӧс. Том пионеръяслӧн туйыс — комсомол пыр коммунист партияӧ.
Сы понда колӧ миянлы, гырысь йӧзлы, ёна отсавны челядьлы кыпӧдчыныс, ӧтувтчыныс. Комсомол отсалӧ. Комсомол велӧдӧ пионеръясӧс. Сідзжӧ и коммунист партиялы колӧ ёнджыка тайӧ удж саяс босьтчыны.
Кыптӧны, быдмӧны выль уджалысьяс. Локтӧны миянӧс вежны.
Миян Коми обласьтын сідзи жӧ, мукӧдлаын моз, пондӧмаӧсь челядь гызьыны. Том вежӧрнаныс сідз жӧ мӧвпалӧны олӧм югдӧдӧм, кыпӧдӧм йылысь. Сӧмын деревняясад омӧля на, шоча на аддзылам пионеръястӧ.
Крестьянаыдлы сьӧлӧм выланыс воӧ — оз видчыны-ёрччыны пионеръяс, оз куритчыны. Сӧмын отрядас оз на зэв лэдзны челядьнысӧ. Полӧны мыйыськӧ.
Тайӧ вежонас, «челядь вежонас», медся ёна деревняясын колӧ уджавны комсомоллы и партиялы дай быд гӧгӧрвоысь мортыслы. Колӧ ӧтувтны челядьсӧ отрядъясӧ, корсявны налы велӧдысьясӧс, юралысьясӧс.
Колӧ висьтавлыны крестьяналы: бур кындзи челядьлы отрядӧ пырӧм нинӧм оз вай. Мед оз повны коммунистӧ «пӧртӧмысь». Челядь быдмасны да асьныс гӧгӧрвоасны, кытчӧ кодкӧд колӧ мунны. Ӧні нин найӧ гӧгӧрвоӧны.
Ӧні нин найӧ писькӧдчӧны выль олӧм лӧсьӧдан туй вылӧ.
Лӧсьӧдчӧны гырысь мудзӧм йӧзӧс вежны. Нуӧдны водзӧ налысь уджсӧ.
Мед быдмӧны бура, мед чорыда ӧтувтчӧны, мед югдӧдӧны юръяснысӧ ёна коми челядь!
Мед став коми крестьяна челядьыс ӧтувтчасны «юнӧй пионер» отрядъясӧ!
