ОТЙЫН

«Миян пӧ тай батьяс зэв этша тӧдлӧмаӧсь да медбура овлӧмаӧсь», — шуӧны Отйын, пондан кӧ мыйкӧ выль олӧм йылысь висьтавлыны. Дерт, оз быдӧн, мукӧдыс веськыдатӧ оз шуны, а овнысӧ — важ моз на олӧны. Выль ногӧн олӧм сэн омӧля тӧдчӧ.

Исполком.

Босьтам Исполкомсянь; воддза воясӧ вӧлі попъяслысь керкаяссӧ босьтӧма (муниципализирован). Ӧні исполком бӧр сеталӧма поп-дяклы. Кӧть эськӧ мед ӧтик керка сетісны пельшӧр пункт улӧ, Отсаяс сійӧс вердныс дугдӧмаӧсь да патератӧ эз сетны — и кайӧма Лыатыӧ: сэні крестьянаыс сетӧмаӧсь патера и вердӧмаӧсь.

Исполкомын уджалысьяс шуасны — домъяссӧ пӧ лои сетны пӧгибӧ воӧмысь, киссьыны пӧ пондісны, а найӧ пӧ кӧсйысисны вӧчны. Вӧчасны дерт — крестьяна вынӧн.

Исполкомлӧн ӧнія уджыс:

гижасьӧм уджыд мунӧ зэв бура — мыйкӧ тай век гижасьӧны! — мужикъяскӧд сёрнитӧны бура жӧ. Сӧмын олӧм кыпӧдӧм уджъяс исполком нуӧдӧ сідз-тадз. Неважӧн тай секретарыс — Максьӧ Миш Ичӧ — восьтӧма вӧлі сельскокӧзяйственнӧй тӧварищество, а сэсся мукӧдтор нинӧм на абу.

Вӧлӧсьт кузяыс туйясыс зэв омӧльӧсь, весиг тыртӧм телегаӧн мунны он вермы. Кӧть эськӧ мед сы пондась мыйкӧ вӧчыштісны. От гӧраыс зэв мольыд, абу уна шоръяс ни, абу нюр, туй лӧсьӧдӧм сэні вылӧ оз сувт.

Медся ыджыд мыж Исполкомлӧн — дыр мӧвпалӧм, дыр кӧсйӧм. Крестьяналӧн таво рудзӧг кӧйдысъяс оз чужавны, а унджыкыслӧн весиг абу. Корлӧмаӧсь кӧйдыс Исполкомысь, а сылӧн ӧнӧдз абу нинӧм лӧсьӧдӧма, кӧйдысыд важӧн нин вӧлі Емдінын сельскокӧз. банкын. Кӧдзан пӧра кутіс кольны, а Исполком пыр на мыйкӧ мӧвпалӧ, кӧйдыстӧ оз вай.

Видз-му юкӧм йылысь.

Во-мӧд нин кӧсйӧны видз-му юкны, да пыр на мыйкӧ оз слӧймыны. Коді озырджык, кодлӧн унджык видз-муыс — сэтшӧмыс пыр на мӧдарӧ зырис. Збыльысь заводитчӧмаӧсь. Колӧ нин. Сӧмын важ ногӧн юклысьӧмысь пӧльза оз ло. Ӧні колӧ заводитлыны вӧчны ещӧ ёна выль ногӧн юкны. Колӧ кыдз-мый позьӧ ӧтлаавлыны торъяссӧ, да юклысигӧн колӧ ӧтиклаынджык сетавны му-видзтӧ тӧвариществояслы дай крестьянаыслы. Отсаяс шуӧны: «кызь вит тега йӧр (зорӧд йӧр) пӧ быд во потша» — сымда пельын налӧн видзьясыс. Гырысь кӧ му-виддзыд лоӧ — бурджык-кокниджык сійӧс уджавныс. Исполкомлы та йылысь оз ков вунӧдны.

Кооперативлӧн удж:

Воддза кооперативын уджалысьяс лавкасӧ юӧм вӧсна пӧртӧмаӧсь нинӧмӧдз. Важ правленньӧыс барыш пыдди 221 шайт абу тырмӧма. Сэтшӧм орӧмысь пыр на кооператив оз вермы веськӧдчыны. Уджалысьясыс эськӧ ӧні бурӧсь да, важ гураныс некыдз оз тыр. Норасьӧны ещӧ Обсоюз вылӧ, тӧварсӧ пӧ сійӧ мукӧд вузасьысь дорысь донӧн сетӧ. Сэсся гӧль ЕПО-яслы (кутшӧм Отйын) омӧля либӧ регыд кежлӧ сетӧ уджӧн. Та вӧсна оз вермы Отса ЕПО бура уджсӧ нуӧдны. Позьӧ шуны — тадз кӧ мӧдас уджавны водзӧ кооператив, ваяс ыджыд пӧльза Отсалы. Окота ещӧ висьтавны — ЕПО-ас уджалысь Тир Миш Ӧльӧш ёна тӧждысьӧ гӧльджык йӧз вӧсна, пыр налы сетӧ кыдз-мый вермӧ отсӧг.

Партиялӧн удж.

Войдӧр Отйын коммунистыд уна вӧлі. Белӧйяс вӧлі лыйлӧмаӧсь 27 коммунистӧс. Ӧні кольӧма став вӧлӧсьтас кык морт. Мый нӧ вермасны вӧчны сы ыджда вӧлӧсьтад кык мортыд? Налӧн удж некӧн оз тӧдчы. Сэсся бара жӧ йӧзыс ас пемыдлунысла партия вылӧ видзӧдӧны син гугӧн.

Эм Отйын ячейка РЛКСМ — морт 5 кымын, да Керӧсын кымынкӧ морт. Сӧмын кулӧмаӧсь-ӧ ловъяӧсь, нинӧм оз кывсьы, кысь нин эськӧ уджыс да! Мукӧд сиктъясын йӧзыс век на узьӧны нэмӧвӧя уннас, сӧмын Кӧжмудорын да Лыатыын неуна кутӧмаӧсь палявны сійӧ унсьыс.

Петрӧ Степ дзоля Вань пи