КОЛӦ... РОСКӦН, ДА ЁНДЖЫКА!

Югыд туй газетын, 181 номерын, печатайтӧма нёль поплысь заявленньӧ — ӧткажитчӧны попалӧмысь.

Тыдалӧ, курдӧдны пондӧма попалӧмыд, тыдалӧ, эз кут польдыны кузь зепъясас. Зэв жӧ нин попъясыд мудерӧсь да яндысьтӧмӧсь. Кор йӧй ыжъястӧ позьӧ вӧлі шырны, сэки найӧ тӧдлісны ентӧ. Йӧзтӧ пыр велӧдлісны грекысь повны, мед ёнджыка волывласны кевмыны вичкоӧ да унджык доход ваясны сьӧмӧн да быдсяматорйӧн. Кор йӧй ыжъясыд пондісны неуна прӧсужмыны, «криста ради подаянньӧыд» пондіс воысь воӧ чинны, сэк найӧ став енсӧ ассьыныс, став йӧй ыжъястӧ эновтӧны, вӧзйысьӧны пырны крестьяна да рабочӧй чукӧрӧ, кӧсйысьӧны овны накӧд ӧтвылысь, религиясӧ ассьыныс шуӧны лӧжнӧйӧн, ылӧдчӧмӧн, асьнысӧ лыддьӧны «ми пӧ лёк гагъяс (паразитъяс) мырсьысь йӧз пытшкын, коммунистъяс пӧ правӧсь». Кӧть найӧ и гижӧны сідз, ӧдвакӧ вежсяс олӧм ногыс, бара жӧ пондасны ылӧдлыны пемыд йӧзтӧ да гудрӧдлыны: «оз пӧ ков сӧвет власьт дор овны, сарӧс пуктӧмӧн пӧ бурджык».

Ме шуа: крестьяна да рабочӧй чукӧрӧ лэдзӧм пыдди сэтшӧм мудер попъяссӧ колӧ..... роскӧн, да ёнджыка, мед и мукӧдлы ас коддьӧмыслы висьтавласны. Код туйӧд мӧдӧмаӧсь мунны, мед сійӧ туйӧд и мунасны помӧдз небеснӧй сарствоӧдз да небеснӧй сар дінӧ.

Том ыж.