ШОЙНАТЫЫН

Мӧймуӧдз Шойнатыса эз тӧдлыны агрономӧс, выль ног му уджалӧм, сӧмын колян восянь кутісны мӧвпавны та йылысь. Агроном висьталӧм серти куим крестьянин кӧдзлісны асланыс му вылӧ бобӧнянь (клевер), таво на вылӧ видзӧдӧмӧн мукӧд крестьяна ньӧжйӧник пондісны кутчысьны выль ног му уджалӧмӧ. Ёна крестьяналы отсалӧ агрономыд аслас велӧдӧмӧн.

Тавоӧдз став Шойнатыас вӧлі сӧмын 4 плуг, таво 50 нин. Тулыснас, мыйӧн вайисны выль плугъяс, ньӧбалісны дажӧ сэтшӧм войтыр, кодъяс неважӧн на вӧлі ёна ӧтдортчӧны плугӧн уджалӧмысь, — шуӧны: плугыд на пӧ тай вӧлӧма добраыс. Гӧръяс, косуляяс шыблалӧны.

Ӧти крестьянин таво кӧдзліс 250 сыв му вылӧ кӧдзан машинаӧн ид. Киӧн кӧдзӧмӧн кӧ ковмис кык пуд да джын кӧйдыс, машинанад петӧма сӧмын пудйӧн‐джынйӧн. Мукӧд муясын дорысь таво му вылас идйыс локтӧ ёна бура, сы понда став сю кӧдзасӧ сійӧ крестьяниныс кӧдзис машинаӧн.

Арталӧмаӧсь, уна-ӧ пӧ воас десятинаысь бобӧнянь тавося воӧм серти. Ӧти крестьянинлӧн усьӧма 400 пуд, мӧдлӧн 250 пуд, коймӧдлӧн 250 пуд. Найӧ шуӧны: тырмас пӧ мырсьыны важ мозыд нюръясысь эжӧра видзьяс вӧчавны, лучшӧ пӧ унджык му вӧчны да кӧдзны турунъяс. Сійӧ туруныд пӧ водзсасяс нюр турунъясыдкӧд куим мында. Турун кӧйдыс крестьяна ӧнісянь нин ньӧбалӧны мӧд во кежлӧ.

Неважӧн Шойнатыын воссис сельскокӧзяйственнӧй кооператив. Тайӧ кооперативыс лӧсьӧдӧ порсь, мӧс, случнӧй пункт. Кӧсйӧны ньӧбны бур ужъяс, ӧшъяс, порсьяс асланыс деньга вылӧ. Тайӧ скӧтыслы эм нин 15 додь ув видз.

Ми чайтам, кооператив, агроном отсалӧм сорӧн, ёна босьтчас выль ног видз-му уджавны да кыпӧдны крестьяналысь овмӧс.

Мукӧд вӧлӧсьтын крестьяналы колӧ вӧтчыны Шойнатыса бӧрысь.

Д. Мишарин.