КЫДЗИ КОЛӦ ЧАНЬЯСӦС БЫДТЫНЫ

Вӧлӧсьтъясын уна крестьянин на оз тӧд, кыдзи колӧ чаньӧс быдтыны; кужтӧм пондаыс посни чаньяс висьмӧны, кулӧны.

Велӧдчӧма тӧдысь йӧз со кыдзи велӧдӧны чаньястӧ быдтыны:

Выль чужӧм чаньяс унджыкысь висьлӧны сустав юкалӧмӧн. Мед эськӧ оз висьны сэтшӧм висьӧмнас, гӧгсӧ колӧ мавтны йодӧн либӧ бур, чистӧй дьӧгӧдьӧн; вундыны сэки гӧгсӧ оз тшӧктыны.

Куим вежонӧдз чужӧм бӧрас чань пӧткӧдчӧ мам йӧлӧн. Нёнясян чаньӧс куимсянь квайт вежонӧдз колӧ ньӧжйӧник велӧдны турун да зӧр сёйны — колӧ вердны ичӧтикаӧн, медбур — небыдик турун и тойӧм зӧр. Зӧр ӧти тувйысь уна лун кежлӧ сетны оз ков. Чаньӧс, кор велалас сёйны зӧр, колӧ сэсся велӧдны сёйны дзонь зӧр. Сизим вежонсянь мам дінысь торйӧдтӧдз чаньлы зӧр колӧ ньӧжйӧник содтавны кык да джын тувйӧдз лун вылӧ.

Медбур кад чаньӧс торйӧдны мам дінысь 5 либӧ 6 тӧлысь бӧрын — кор гӧныс пондас вушйыны (вежсьыны). Мед мам дінысь торйӧдӧм чань регыдджык вунӧдас мам йӧвсӧ, сійӧ оланінӧ колӧ лӧсьӧдны свежӧй ва тыра дозмук.

Кор чань велалас юны ва, дозмук позьӧ идравны, сійӧс юктавны ведраысь лун кежлӧ нёльысьӧдз. Юктавны колӧ сёйӧм водзвылын.

Торйӧдӧм мысти чаньӧс, кыдз позяс, медвойдӧр колӧ велӧдны весавны, сы помысь сійӧ бурджыка быдмас. Весавны колӧ гартӧм идзасӧн либӧ тшӧткаӧн. Торйӧдӧм кадсянь арӧс тыртӧдз кӧрым чаньлы пыр колӧ содтыштавны: зӧр 4½ тувйӧдз, бур турун 6−8 тувйӧдз лун вылӧ.

Тайӧ бур велӧдӧм крестьяналы колӧ кывзыны.