ТОМ ЙӦЗ, СТАВНЫД ДЕМОНСТРАЦИЯ ВЫЛӦ!
Коми том войтыр! 7-ӧд лунӧ сентябр тӧлысьын ставмувывса том йӧз кутасны дасӧдысь празднуйтны ассьыныс праздник. Сійӧ луннас уджалысь том йӧз видлалӧны ассьыныс вынсӧ, петкӧдлӧны буржуазиялы, мый уджалысь том йӧз, коммунистическӧй
Ми, коми том йӧз, олам Сӧветскӧй Республикаын, огӧ тӧдӧ озыр йӧзлысь миянӧс ӧбӧдитӧм, бырӧдім буржуйясӧс, миянлы сетӧма вӧля организуйтчыны, быдлаын уджавны, лӧсьӧдны ассьыным олӧм выль ногӧн. Миянӧдз оз кыв, кыдзи горзӧны уджалысь том йӧз мукӧд государствоын озыръяс ӧбӧдитӧмысь. Ми ӧні мирнӧй пӧраӧ велӧдчам, кыдзи бурджыка стрӧитны ӧтвывса олӧм. Видзӧдламӧй, мый керӧны уджалысь том йӧзкӧд озыръяс мукӧд государствоын — Германияын, Италияын, мукӧдлаын. Озыр йӧз найӧс личкӧны, уна сюрс морт пукалӧ тюрмаын налы паныд мунӧмысь, лыйлӧны, ӧшлӧны, лунысь лунӧ унджык.
Ми нӧ, революция вӧчӧм бӧрын, вермамӧ-ӧ тадзи видзӧдны сы вылӧ? Огӧ, огӧ вермӧ! Миян уджалысь коми том йӧзлы колӧ чургӧдны налы паныд отсӧг мыйӧн вермам. Ми тӧдам: уджалысь йӧзлӧн эм ӧти враг — буржуазия, найӧ косясьӧны уджалысь йӧзкӧд ставныс ӧтвылысь. Кусасны кӧ революцияяс, кодъяс кыптӧны мукӧдлаын, озыръяс миян вылӧ ставныс уськӧдчасны, пуксясны миян вылӧ. Сы вӧсна и миянлы колӧ отсавны мукӧд государствоса уджалысь том йӧзлы.
Колӧ лӧсьӧдны сійӧ лунас быд вӧлӧсьтӧ революционеръяслы отсалан чукӧр (МОПР) да сы пыр дугдывтӧг налы отсавны; отсӧгнас ми пыр ӧтарӧ чинтам буржуйяслысь вынсӧ.
Колӧ сэсся асьтӧ гӧтӧвитны. Ковмас кӧ петны озырлы паныд — мед ставным вӧлім гӧтовӧсь.
Сійӧ луннас став му вылас уджалысь том йӧз петӧны демонстрация вылӧ комсомолкӧд. Петамӧй тшӧтш и ми, коми том войтыр, митингъяс вылӧ сійӧ луннас комсомолкӧд ӧтвылысь! Рытнас мунамӧ клубъясӧ, либӧ нардомъясӧ, сэні висьталасны унатор том йӧз вермасьӧм йылысь.
Шефъяслы колӧ сійӧ лун кежлӧ быд вӧлӧсьтын мыйкӧ вӧчны.
Рочев.
