ВУНӦДӦМ УДЖ

Мый колӧ коми школа, коми литература, коми кыв вылын став удж нуӧм — сы йылысь зэв лӧсьыда и веськыда шуис обласьтувса съезд коммунистъяслӧн.

Дерт, коми литератураӧн медъёна, медлӧсьыда позьӧ разӧдны быд бур, быд юӧр, быд дум коммунист партиялысь, сӧвет власьтлысь. Сійӧн садь юра йӧз и шуӧны, коми литература пӧ колӧ.

Колӧ кӧ, колӧ и вӧчны, быдтыны. Гижысьяс кындзи ӧд нӧшта на мыйсюрӧ колӧ. Колӧ сьӧм. А сьӧмыс абу, этша нига лэдзанінлӧн.

Ёна нин кодсюрӧ кышым-кашым ветлӧдлісны Обисполкомті да, мукӧдлаті да — корӧны сьӧм, пӧгибӧ пӧ воим, уджйӧзным юр вывтіным.

Ёна норасьӧм бӧрын Нига лэдзанінӧс (Издательствоӧс) Обисполком ӧні отсалыштӧ, мый вермӧ. Но удж кӧ чорыда паськӧдны — сійӧ оз на тырмы. Колӧ нӧшта на кодлӧнкӧ отсӧг.

Код отсалас коми литература быдтӧмлы, оз кӧ ачыс коми йӧзыс?

Некод, дзик некод!

Роч нигаясысь ми, коми йӧз, омӧля, либӧ дзик огӧ гӧгӧрвоӧ. Мед миянлы гижасны комиӧн, быд буртор, бурӧ велӧдантор — сэки вот гӧгӧрвоам.

Озджык кӧ Издательство вермы, ачыс коми йӧз кӧть неуна-а кутас отсавны, сӧмын кодлыкӧ колӧ босьтчыны, уджсӧ котыртны, туй вылӧ сувтӧдны.

Кӧнсюрӧ вӧлӧсьтъясын нин та йылысь сёрнитӧны. Нэмдінын (Усьт-Немын) чукӧртӧмаӧсь 36 шайт. Чукӧртасны и мукӧдлаын.

Тӧдӧй, коми йӧз: сӧмын коми литератураӧн, гӧгӧрвоан кывйӧн гижӧм литератураӧн, суӧдам мукӧд йӧзӧс!

Отсалӧй!

С. Антус.