ЛОНДОНСА КОНФЕРЕНЦИЯ ЙЫЛЫСЬ СЁРНИ

ПАРИЖ. Лондонса конференция вылын сёрни мунӧм йылысь Эррио (министръяслӧн председательыс) парламентын (Госуд. дума) вӧчӧма доклад. Висьталӧма, ӧні пӧ Германиялы уджйӧз кокньыдджык лоӧ мынтыны, сы понда пӧ немечьяс регыд бӧр ёнмасны. Германиялы конференция вылын сетӧма права мынтыны уджйӧзсӧ деньгаӧн пыдди эмбурӧн. Франциялы пӧ таво Германия кӧсйысьӧма мынтыны уджйӧз сё миллион шайт гӧгӧр дон. Эррио шуӧ, парламентлы пӧ колӧ утвердитны конференция вылын правительствояс костын лӧсьӧдчӧм. Тайӧ лӧсьӧдчӧм бӧрын государствояс костын оз кутны лоны зыкъяс.

Эррио бӧрын кыв кутіс коммунистъяслӧн парламентӧ бӧрйӧм морт — Доррио. Доррио шуӧ: Лондонса лӧсьӧдчӧмын пӧ ӧти кыв весиг абу война панысьяскӧд вермасьӧм йылысь, сы понда тайӧ лӧсьӧдчӧмӧн бур шы ни тӧв олӧм оз на бара ло.

Доррио видӧ Германияса социалистъясӧс озыр йӧз дор сулалӧмысь, Францияса социалистъясӧс — ті пӧ кыдз-мый верманныд отсаланныд банкиръяслы уджалысь йӧзӧс топӧдны, нартитны. Парламентын унджык йӧзыс лэптылӧмаӧсь кинысӧ Эррио дор.